"அவசியமின்றி தங்கம் வாங்காதீர்கள்!" : வெளிநாட்டு பயணங்களை தவிருங்கள் : பிரதமர் மோடி வேண்டுகோள்!

ஷாங்காய் உச்சி மாநாட்டின் நடுவே சிறப்பு வீடியோ

உஸ்பெகிஸ்தான் மற்றும் கிர்கிஸ்தான் நாடுகளுக்கான பயணத்தின் ஒரு பகுதியாக, ஷாங்காய் ஒத்துழைப்பு அமைப்பின் (SCO) உச்சிமாநாட்டில் பங்கேற்கப் பிரதமர் நரேந்திர மோடி பிஷ்கெக் நகரில் உள்ளார்.

இந்த நிலையில், தனது இன்ஸ்டாகிராம் பக்கத்தில் வீடியோ ஒன்றை வெளியிட்டு நாட்டு மக்களுக்கு பல முக்கிய வேண்டுகோள்களை முன்வைத்துள்ளார்.

பிரதமர் மோடியின் முக்கிய வேண்டுகோள்கள்

அந்த வீடியோவில் பேசி இருக்கும் பிரதமர் மோடி, நாட்டின் பொருளாதாரத்தை வலுப்படுத்தவும் தற்சார்பை உயர்த்தவும் பின்வரும் கருத்துகளை வலியுறுத்தியுள்ளார்.

தங்கம் வாங்குவதைத் தவிர்க்க வலியுறுத்தல்

மிக அவசியமான சூழலைத் தவிர்த்து, தேவையற்ற நேரங்களில் தங்கம் வாங்குவதை பொதுமக்கள் தவிர்க்க வேண்டும்.

'வெட் இன் இந்தியா'

வெளிநாடுகளுக்கு சென்று ஆடம்பரமாக திருமணம் செய்வதை மக்கள் குறைத்துக் கொள்ள வேண்டும். அதற்கு பதிலாக இந்தியாவிலேயே திருமணங்களை நடத்தும் 'வெட் இன் இந்தியா' முறையை ஊக்குவிக்க வேண்டும்.

பொழுதுபோக்கிற்காக வெளிநாடுகளுக்கு செல்லும் சுற்றுலாப் பயணங்களை குறைத்துக் கொள்ளுமாறு கேட்டுக்கொண்டுள்ளார்.

வளர்ந்த இந்தியா தான் இலக்கு

"நாம் எந்த அளவுக்கு உள்நாட்டுப் பொருட்களுக்கும் தற்சார்பு நிலைக்கும் முக்கியத்துவம் கொடுக்கிறோமோ, அந்த அளவுக்கு இந்தியா தனது 100-வது சுதந்திர தினத்தைக் கொண்டாடும் போது நமது இளைய தலைமுறைக்கு ஒரு வளர்ந்த இந்தியாவை உருவாக்க முடியும்" என்று தெரிவித்துள்ளார்.

7.8% ஜிடிபி வளர்ச்சி

நடப்பு நிதியாண்டின் முதல் காலாண்டில் உலகளாவிய சவால்கள் மற்றும் விநியோகச் சங்கிலித் தடங்கல்களுக்கு மத்தியிலும் நாட்டின் பொருளாதார வளர்ச்சி 7.8 சதவீதமாகப் பதிவாகியுள்ளதற்கு நாட்டு மக்களுக்குப் பாராட்டு தெரிவித்தார்.

எதிர்க்கட்சிகளுக்குப் பதிலடி

"இந்தியா வேகமாக முன்னேறி வருகிறது. அதே வேளையில், இந்தியாவிற்குள்ளேயே விரக்தியில் மூழ்கியிருப்பவர்கள் 'பொய்யின் எதிரொலியை' எங்கும் பரப்பிக் கொண்டிருக்கிறார்கள்.

சவால்களை முறியடித்து நாடு 7.8% வளர்ச்சியை எட்டியுள்ளது; இந்த வேகத்தை நாம் தக்கவைக்க வேண்டும்" எனக் கூறி எதிர்க்கட்சிகளை மறைமுகமாக சாடினார்.

தங்கம் கட்டுப்பாட்டின் பின்னணி காரணம்

தேவையற்ற தங்கக் கொள்முதலைக் குறைப்பதன் மூலம் நாட்டின் அந்நியச் செலாவணி இருப்பு வீணாவதைத் தடுக்க முடியும்.

மேலும், இது இந்திய ரூபாயின் மதிப்பை சர்வதேச சந்தையில் வலுப்படுத்த உதவும் என்பதாலேயே மக்களிடம் பிரதமர் மோடி இந்த வேண்டுகோளை முன்வைத்துள்ளார்.

====