உலகளவில் எதிரொலித்த விடுதலை முழக்கம்
பிரிட்டிஷ் ஆதிக்கத்திலிருந்து இந்தியா சுதந்திரம் பெற்றது, ஒரு தனிநாட்டின் அரசியல் வெற்றி மட்டுமன்றி உலகளவில் காலனித்துவ ஆட்சி முடிவுக்கு வர முக்கியக் காரணியாக அமைந்தது.
பிற நாடுகளுக்கு உத்வேகமளித்த இந்தியா
இந்தியாவின் வரலாற்றுச் சிறப்புமிக்க இந்த விடுதலைப் போராட்டம், ஆசிய மற்றும் ஆப்பிரிக்கப் பிராந்தியங்களில் அடிமைப்பட்டுக் கிடந்த நாடுகளுக்கு தன்னாட்சி பெறப் பெருமளவில் உத்வேகமளித்தது.
இதன் விளைவாக, சுமார் 118 நாடுகள் சுயாட்சி பெற்று உலக வரைபடத்தையே மறுசீரமைத்தன என்பது தான் நிதர்சனமான உண்மை.
ஆசிய நாடுகளுக்கு வழிவகுத்த மாற்றம்
இந்தியாவின் சுதந்திரத்தைத் தொடர்ந்து, 1948-ல் மியான்மரும் இலங்கையும் பிரிட்டிஷ் பிடியிலிருந்து விடுதலை பெற்றன. தொடர்ந்து 1957-ல் மலேசியாவும், 1965-ல் மாலத்தீவுகளும் சுதந்திரம் அடைந்தன.
புதிய இறையாண்மை கொண்ட நாடுகள்
இந்தியாவின் தார்மீக மற்றும் ராஜதந்திர ஆதரவால் 1971-ல் வங்கதேசம் உருவானதுடன், 2002-ல் சுதந்திரம் பெற்ற கிழக்கு திமோர் வரை ஆசியப் பிராந்தியத்தில் புதிய இறையாண்மை கொண்ட நாடுகள் உருவெடுத்தன.
ஆப்பிரிக்கக் கண்டத்தில் வெடித்த சுதந்திர எழுச்சி
1950 மற்றும் 60-களின் காலகட்டத்தில் ஆப்பிரிக்காவில் விடுதலைப் போராட்டம் உச்சமடைந்தது. 1957-ல் கானா சுதந்திரம் அடைந்ததைத் தொடர்ந்து, 1960-ஆம் ஆண்டில் நைஜீரியா, காங்கோ, செனகல், மாலி உட்படப் பல நாடுகள் விடுதலை பெற்றதால் அது 'ஆப்பிரிக்காவின் ஆண்டு' என்று அழைக்கப்பட்டது.
மேலும் கென்யா, அல்ஜீரியா, நமீபியா மற்றும் 2011-ல் உருவான தெற்கு சூடான் வரை பல நாடுகள் சுதந்திரக் காற்றைச் சுவாசித்தன.
தீவு நாடுகளின் தன்னாட்சிப் பயணம்
கரீபியப் பகுதியில் அமைந்த ஜமைக்கா, கயானா, பார்படாஸ், பஹாமாஸ் போன்ற தீவு நாடுகள் 1960 மற்றும் 70-களில் தங்களது சுதந்திரத்தை உறுதி செய்தன. இதேபோல், பசிபிக் பெருங்கடல் பிராந்தியத்தைச் சேர்ந்த பிஜி, பப்புவா நியூ கினியா, சாலமன் தீவுகள் உள்ளிட்ட பல சிறிய நாடுகள் தன்னாட்சி அதிகாரத்தைப் பெற்றன.
மாறி அமைந்த உலக அரசியல் வரைபடம்
1991-ல் சோவியத் யூனியனின் வீழ்ச்சிக்கு பிறகு உக்ரைன், கஜகஸ்தான் உள்ளிட்ட பல நாடுகள் தனித்தனி தேசங்களாகப் பிரரிந்தன. இந்திய சுதந்திரம் அளித்த வலுவான அடித்தளமே, உலகளவில் பேரரசுகளின் ஆதிக்கத்தை வீழ்த்தி, பலதரப்பட்ட நாடுகளின் குரல் உலக அரங்கில் ஒலிக்கப் பிரதான உத்வேகமாக இருந்தது.
======
