கர்நாடக மாநிலம் மங்களூருவில் உள்ள பாலா (Bala) பகுதியில் இந்த அதிநவீன LPG சேமிப்புக் கிடங்கு அமைக்கப்பட்டுள்ளது.
ஹிந்துஸ்தான் பெட்ரோலியம் கார்ப்பரேஷன் லிமிடெட் (HPCL) நிறுவனத்திற்காக மேகா இன்ஜினியரிங் அண்ட் இன்ஃப்ராஸ்ட்ரக்சர்ஸ் லிமிடெட் (MEIL) நிறுவனம் இதனை உருவாக்கியுள்ளது.
சுமார் ரூ.854 கோடி மதிப்பில் கட்டப்பட்டுள்ள இந்த திட்டத்தில், ஒரே நேரத்தில் 80,000 மெட்ரிக் டன் திரவமாக்கப்பட்ட பெட்ரோலிய வாயுவை (LPG) சேமிக்க முடியும்.
இதன் மூலம் இந்தியாவின் மிகப்பெரிய நிலத்தடி LPG சேமிப்புக் கிடங்காக இது உருவெடுத்துள்ளது.
இந்த கிடங்கின் மிக முக்கியமான சிறப்பம்சமே அதன் கட்டமைப்புதான்.
வழக்கமான எரிவாயு சேமிப்பு தொட்டிகளைப் போல தரைக்கு மேலே அமைக்காமல், பூமிக்கு அடியில் கடினமான பாறைகளை குடைந்து இந்தச் சேமிப்புக் கிடங்கு உருவாக்கப்பட்டுள்ளது.
சுமார் 500 மீட்டர் ஆழத்தில் அமைக்கப்பட்டுள்ள இந்த நிலத்தடி குகை போன்ற கட்டமைப்பு, LPG-யை பாதுகாப்பாக சேமிக்கும் வகையில் வடிவமைக்கப்பட்டுள்ளது.
மேலும், இரண்டு தனித்தனி நிலத்தடி சேமிப்புப் பகுதிகளையும் கொண்டுள்ளது.
இந்தியா தனது LPG தேவையின் ஒரு கணிசமான பகுதியை வெளிநாடுகளில் இருந்து இறக்குமதி செய்து வருகிறது.
குறிப்பாக சர்வதேச அரசியல் பதற்றங்கள், போர் சூழல்கள் மற்றும் கப்பல் போக்குவரத்து பாதிப்புகள் போன்ற காரணங்களால் எரிபொருள் விநியோகத்தில் திடீர் தடைகள் ஏற்பட வாய்ப்புள்ளது.
இத்தகைய சூழல்களில் போதுமான அளவு LPG-யை முன்கூட்டியே சேமித்து வைத்திருப்பது மிகவும் அவசியமாகிறது.
மங்களூருவில் உருவாக்கப்பட்டுள்ள இந்த நிலத்தடி கிடங்கு, இறக்குமதி விநியோகத்தில் ஏற்படும் பாதிப்புகளை சமாளிக்கவும், நாட்டின் LPG கையிருப்பை அதிகரிக்கவும் உதவும் என எதிர்பார்க்கப்படுகிறது.
இந்தியாவில் ஏற்கெனவே ஆந்திரப் பிரதேசத்தின் விசாகப்பட்டினத்தில் 60,000 மெட்ரிக் டன் கொள்ளளவு கொண்ட நிலத்தடி LPG சேமிப்புக் கிடங்கு செயல்பாட்டில் உள்ளது.
தற்போது மங்களூருவில் உருவாக்கப்பட்டுள்ள 80,000 மெட்ரிக் டன் கொள்ளளவு கொண்ட புதிய கிடங்கு, நாட்டின் இரண்டாவது நிலத்தடி LPG சேமிப்பு கட்டமைப்பாகவும், மிகப்பெரியதாகவும் அமைந்துள்ளது.
=====================