ஐஎன்எஸ் சமர்தக் :
இந்தியாவின் பாதுகாப்புத் துறையில் தற்சார்பு உற்பத்தியை வலுப்படுத்தும் வகையில், உள்நாட்டிலேயே தயாரிக்கப்பட்ட பல்நோக்கு கப்பலான ஐஎன்எஸ் சமர்தக் (INS Samarthak) நாட்டுக்கு அர்ப்பணிக்கப்பட்டுள்ளது.
கர்நாடக மாநிலம் கார்வாரில் நடைபெற்ற நிகழ்ச்சியில், குடியரசு துணைத் தலைவர் சி.பி. ராதாகிருஷ்ணன் இக்கப்பலை நாட்டுக்கு அர்ப்பணித்தார்.
இந்நிகழ்ச்சியில் இந்தியக் கடற்படை தளபதி அட்மிரல் கிருஷ்ணா சுவாமிநாதன் உள்ளிட்ட உயர் அதிகாரிகள் பங்கேற்றனர்.
ஐஎன்எஸ் சமர்தக் கப்பல் 75 சதவீதத்துக்கும் அதிகமான உள்நாட்டு பங்களிப்புடன் உருவாக்கப்பட்டுள்ளது.
இது இந்தியாவின் தொழில்நுட்ப வளர்ச்சி, தொழில்துறை திறன் மற்றும் உள்நாட்டுக் கப்பல் கட்டுமானத்தின் முன்னேற்றத்தை எடுத்துக்காட்டுகிறது.
பாதுகாப்பு தேவைகளுக்காக வெளிநாடுகளை சார்ந்திருப்பதைக் குறைத்து, இந்தியாவிலேயே நவீன பாதுகாப்பு தளவாடங்களை தயாரிக்கும் முயற்சிக்கு இந்தக் கப்பல் முக்கியத்துவம் அளிக்கிறது.
ஐஎன்எஸ் சமர்தக் பல்வேறு கடற்படைப் பணிகளுக்காகப் பயன்படுத்தப்பட உள்ளது.
கடல்சார் கண்காணிப்பு, உளவுப் பணிகள், கடலில் ரோந்து பணி மற்றும் ஆளில்லா கருவிகளை பயன்படுத்துதல் உள்ளிட்ட நடவடிக்கைகளில் இக்கப்பல் உதவும்.
மேலும், அடுத்த தலைமுறை ஆயுதங்கள், கண்காணிப்பு கருவிகள் மற்றும் நவீனத் தொழில்நுட்பங்களை சோதித்து பார்ப்பதற்கான தளமாகவும் இது செயல்படும்.
இந்தியக் கடற்படை நாட்டின் இறையாண்மையையும் கடல்சார் நலன்களையும் பாதுகாப்பதில் முக்கியப் பங்கு வகிக்கிறது.
இந்தியப் பெருங்கடல் பகுதியில் கடற்கொள்ளையை தடுப்பது, வெளிநாடுகளில் சிக்கித் தவிக்கும் இந்தியர்களை மீட்பது, மனிதாபிமான உதவிகளை வழங்குவது, இயற்கை பேரிடர்களின்போது நிவாரண பணிகளை மேற்கொள்வது போன்ற பல்வேறு நடவடிக்கைகளிலும் கடற்படை ஈடுபட்டு வருகிறது.
இந்தியாவின் பாதுகாப்பு தளவாட உற்பத்தியை மேலும் வலுப்படுத்த வேண்டியதன் அவசியத்தையும் குடியரசு துணைத் தலைவர் சி.பி. ராதாகிருஷ்ணன் வலியுறுத்தினார்.
கடற்படை, பொதுத்துறை பாதுகாப்பு நிறுவனங்கள், தனியார் கப்பல் கட்டும் நிறுவனங்கள், பாதுகாப்பு ஆராய்ச்சி மற்றும் மேம்பாட்டு அமைப்பு, கல்வி நிறுவனங்கள், குறு, சிறு மற்றும் நடுத்தர தொழில் நிறுவனங்கள், புத்தொழில் நிறுவனங்கள் ஆகியவை ஒருங்கிணைந்து செயல்பட வேண்டும் என்று அவர் குறிப்பிட்டார்.
===================
