மழைக்கால கூட்டத்தொடர்
பரபரப்பான அரசியலில் சூழலில் நாடாளுமன்ற மழைக்கால கூட்டத் தொடர் 20ம் தேதி தொடங்கி ஆகஸ்ட் 13-ம் தேதி வரை நடைபெற உள்ளது. பல்வேறு பிரச்சினைகளை எழுப்ப எதிர்க்கட்சிகள் திட்டமிட்டு உள்ளன.
நிலுவையில் உள்ள மசோதாக்கள்
கடந்த ஏப்ரல் மாதம் மக்களவையில் மகளிர் இடஒதுக்கீட்டை அமல்படுத்துவதற்கான மசோதாக்கள் தாக்கல் செய்யப்பட்டன.
இந்த மசோதாக்கள் மூலம் மக்கள்தொகை அடிப்படையில் மக்களவைத் தொகுதிகளை மறுவரையறை செய்ய முடியும்.
மூன்றில் இரண்டு பங்கு ஆதரவு கிடைக்காததால் இந்த மசோதாக்கள் மக்களவையில் தோல்வி அடைந்தன.
மசோதாக்கள் தாக்கல் - அரசு தீவிரம்
இந்நிலையில், மழைக்கால கூட்டத் தொடரில் மகளிர் இடஒதுக்கீட்டுக்கான மசோதாக்களை மக்களவையில் மீண்டும் தாக்கல் செய்ய மத்திய அரசு திட்டமிட்டு உள்ளது.
பாஜகவின் பலம் அதிகரிப்பு
கடந்த சில மாதங்களில் திரிணமூல் காங்கிரஸ், ஆம் ஆத்மி, சிவசேனா (உத்தவ் அணி) கட்சிகளைச் சேர்ந்த எம்பிக்கள், பாஜகவுக்கு அணி மாறி உள்ளனர்.
இதனால் மக்களவை, மாநிலங்களவையில் பாஜகவுக்குக் கூடுதல் பலம் கிடைத்திருக்கிறது.
இதர கட்சிகளின் ஆதரவோடு மகளிர் இடஒதுக்கீட்டுக்கான மசோதாக்களை நிறைவேற்ற மத்திய அரசு வியூகம் வகுத்திருப்பதாகக் கூறப்படுகிறது.
குதிரை பேரம் - குற்றச்சாட்டு
ஆனால், எதிர்க்கட்சி எம்.பி.க்கள், எம்எல்ஏக்களை குதிரை பேரம் மூலம் பாஜக இழுப்பதாக எதிர்க்கட்சிகள் கடுமையாக குற்றம் சாட்டி வருகின்றன. இதுதொடர்பாக நாடாளுமன்றத்தில் பிரச்சினை எழுப்ப எதிர்க்கட்சிகள் முடிவு செய்துள்ளன.
30 நாட்கள் சிறை, பதவி நீக்கம் - மசோதா
பிரதமர், முதல்வர்கள், அமைச்சர்கள் குற்ற வழக்குகளில் கைது செய்யப்பட்டு 30 நாட்களுக்கு மேல் சிறையில் இருந்தால் அவர்களைப் பதவி நீக்க வகை செய்யும் மசோதாவை நிறைவேற்ற மத்திய அரசு திட்டமிட்டு உள்ளது.
எதிர்க்கட்சிகள் வியூகம்
பல்வேறு விவகாரங்கள் குறித்து நாடாளுமன்றத்தில் பிரச்சினை எழுப்ப எதிர்க்கட்சிகள் திட்டமிட்டு உள்ளன. நீட் வினாத்தாள் விவகாரம், அயோத்தி முறைகேடு, குதிரை பேரம், உள்ளிட்டவை நாடாளுமன்றத்தில் முக்கிய விவாத பொருளாக கொண்டு வர எதிர்க்கட்சிகள் முடிவு செய்துள்ளன.
19ல் அனைத்துக் கட்சிக்கூட்டம்
மழைக்கால கூட்டத் தொடரை சுமுகமாக நடத்துவது குறித்து ஜூலை 19-ம் தேதி அனைத்துக் கட்சிக் கூட்டத்துக்கு மத்திய அரசு அழைப்பு விடுத்துள்ளது.
நாட்டின் நலன் கருதி மக்களவை, மாநிலங்களவையைச் சுமுகமாக நடத்த எதிர்க்கட்சிகள் ஆதரவு கோரப்படும் என்று மத்திய அரசு வட்டாரங்கள் தெரிவித்துள்ளன.
===========
