பாஜக அறிவித்துள்ள ஒரு மாத மாபெரும் மக்கள் சேவை இயக்கம்!
பிரதமர் நரேந்திர மோடி பொது வாழ்க்கையில் 25 ஆண்டுகளை நிறைவு செய்வதையொட்டி பாஜக 'சேவா சங்கல்ப் அபியான்' என்ற ஒரு மாத சேவை இயக்கத்தை அறிவித்துள்ளது.
பொது வாழ்க்கையில் 25 ஆண்டுகள்
பிரதமர் நரேந்திர மோடியின் பொது வாழ்க்கையில் 25 ஆண்டுகள் நிறைவடைவதைக் கொண்டாடும் வகையில், பாரதிய ஜனதா கட்சி சார்பில் 'சேவா சங்கல்ப் அபியான்' என்ற மாபெரும் மக்கள் சேவை இயக்கத்திற்கு ஏற்பாடு செய்யப்பட்டுள்ளது.
பிரதமர் நரேந்திர மோடி கடந்த 2001-ஆம் ஆண்டு அக்டோபர் 7-ஆம் தேதி முதன்முறையாக குஜராத் முதலமைச்சராகப் பொறுப்பேற்றார்.
13 ஆண்டுகள் முதல்வர் பின்னர் பிரதமர்
தொடர்ந்து 13 ஆண்டுகள் குஜராத் முதல்வராகவும், 2014 மே 26 முதல் நாட்டின் பிரதமராகவும் பணியாற்றி வருகிறார். இதன் மூலம் வரும் அக்டோபர் 7-ஆம் தேதியுடன் அவர் அரசுப் பதவிகளில் 25 ஆண்டுகளை நிறைவு செய்கிறார்.
ஒரு மாத கால சேவை இயக்கம்
பிரதமரின் சேவை அர்ப்பணிப்பைப் பிரதிபலிக்கும் வகையில், இந்த மாபெரும் மக்கள் சேவை இயக்கம் வரும் செப்டம்பர் 17-ஆம் தேதி தொடங்கி அக்டோபர் 17-ஆம் தேதி வரை ஒரு மாத காலத்திற்கு நடைபெறவுள்ளது.
இத்திட்டத்தை ஒருங்கிணைக்க பாஜக தேசியத் தலைவர் நிதின் நவீன் தலைமையில் தேசிய ஒருங்கிணைப்புக் குழு ஒன்று அமைக்கப்பட்டுள்ளது. இதில் நாடு முழுவதும் உள்ள கோடிக்கணக்கான பாஜக தொண்டர்கள் மற்றும் பொதுமக்கள் பங்கேற்கவுள்ளனர்.
நலத்திட்டங்களும் ரத்த தான முகாமும்
டெல்லியில் உள்ள பாஜக தலைமையகத்தில் செய்தியாளர்களை சந்தித்த தேசியத் தலைவர் நிதின் நவீன், "செப்டம்பர் 17-ஆம் தேதி நாடு முழுவதும் நடைபெறும் பிரமாண்ட ஒரு நாள் ரத்த தான முகாம்களுடன் இந்த இயக்கம் தொடங்குகிறது.
நலத்திட்ட உதவிகள் வழங்கும் நிகழ்ச்சி
தொடர்ந்து ஒரு மாத காலத்திற்குத் தூய்மைப் பணிகள், மரக்கன்றுகள் நடுதல் மற்றும் பல்வேறு நலத்திட்ட உதவிகள் வழங்கும் நிகழ்ச்சிகள் நடைபெறும்" எனத் தெரிவித்தார். பொதுமக்கள் அனைவரும் இந்த நற்பணிகளில் தங்களை இணைத்துக் கொள்ள வேண்டும் என்றும் வேண்டுகோள் விடுக்கப்பட்டுள்ளது.
=====
