சென்னையின் முக்கிய உட்கட்டமைப்பு திட்டங்களில் ஒன்றாகக் கருதப்படும் பூந்தமல்லி - வடபழனி மெட்ரோ ரயில் வழித்தடப் பணிகள் முழுமையாக நிறைவடைந்துள்ளன.
மேற்கு சென்னை பகுதிகளை நகரின் முக்கிய மையங்களுடன் இணைக்கும் இந்த திட்டம், போக்குவரத்து நெரிசலை குறைப்பதில் முக்கிய பங்காற்றும் என எதிர்பார்க்கப்படுகிறது.
நிறைவடைந்துள்ள மெட்ரோ திட்டங்களை திறந்து வைப்பதற்காக பிரதமர் நரேந்திர மோடி வரும் அக்டோபர் 11-ஆம் தேதி சென்னை வர உள்ளதாக தகவல்கள் வெளியாகியுள்ளன.
இதையடுத்து திறப்பு விழாவுக்கான ஏற்பாடுகளை சென்னை மெட்ரோ ரயில் நிறுவனம் மற்றும் அரசுத் துறைகள் தீவிரப்படுத்தியுள்ளன.
பிரதமர் வருகையை முன்னிட்டு மெட்ரோ வழித்தடம் முழுவதும் அழகுபடுத்தும் பணிகள் நடைபெற்று வருகின்றன.
குறிப்பாக மெட்ரோ தூண்களில் வண்ண ஓவியங்கள் வரையப்பட்டு வருகின்றன.
சென்னை கலாசாரம், பாரம்பரியம் மற்றும் நவீன நகர வளர்ச்சியை பிரதிபலிக்கும் வகையில் இந்த ஓவியங்கள் அமைக்கப்பட்டு வருகின்றன.
மெட்ரோ தூண்களுக்கு இடையிலான பகுதிகளில் செடிகள் மற்றும் அலங்காரத் தாவரங்கள் நடப்பட்டு பசுமை சூழல் உருவாக்கும் பணிகளும் மேற்கொள்ளப்பட்டு வருகின்றன.
இதன் மூலம் மெட்ரோ வழித்தடத்தின் தோற்றம் மேலும் அழகுபெறுவதுடன், நகரின் சுற்றுச்சூழல் மேம்பாட்டுக்கும் உதவும் என அதிகாரிகள் தெரிவிக்கின்றனர்.
திறப்பு விழாவிற்கு இன்னும் சில நாட்களே உள்ள நிலையில், சாலை சீரமைப்பு, தூய்மை பணிகள், பாதுகாப்பு ஏற்பாடுகள் உள்ளிட்ட பல்வேறு பணிகளை அதிகாரிகள் நேரடியாக ஆய்வு செய்து வருகின்றனர்.
பிரதமர் வருகையை முன்னிட்டு எந்த குறையும் இல்லாத வகையில் அனைத்து பணிகளும் ஒருங்கிணைக்கப்பட்டு வருகிறது.
பூந்தமல்லி - வடபழனி மெட்ரோ சேவை தொடங்கப்படுவதன் மூலம் தினசரி ஆயிரக்கணக்கான பயணிகள் பயனடைவார்கள் என எதிர்பார்க்கப்படுகிறது.
குறிப்பாக மேற்கு சென்னை பகுதிகளில் இருந்து நகரின் பிற பகுதிகளுக்கு செல்லும் பயண நேரம் கணிசமாக குறையும் என்பதால், இந்த புதிய மெட்ரோ சேவைக்காக சென்னை மக்கள் ஆவலுடன் காத்திருக்கின்றனர்.
மெட்ரோ திட்ட திறப்பு விழாவில் தமிழக முதலமைச்சர் ஜோசப் விஜய்யும் பங்கேற்க உள்ளதாக தகவல்கள் வெளியாகியுள்ளன.
பிரதமர் மோடி மற்றும் முதலமைச்சர் விஜய் ஒரே மேடையில் பங்கேற்கும் நிகழ்வாக இது அமையக்கூடும் என்பதால் அரசியல் வட்டாரங்களிலும் இந்த நிகழ்ச்சி கவனம் பெற்றுள்ளது.
இருப்பினும், அதிகாரப்பூர்வ நிகழ்ச்சி நிரல் இன்னும் வெளியாகவில்லை.
===================
