இந்திய தலைமைத் தேர்தல் ஆணையர் ஞானேஷ் குமாரை பதவி நீக்கம் செய்யக் கோரி கேரள சட்டப்பேரவையில் தீர்மானம் நிறைவேற்றப்பட்டதாகத் தகவல் வெளியாகியுள்ளது.
வாக்காளர் பட்டியல் சிறப்பு தீவிர திருத்தமான SIR நடைமுறை தொடர்பான சர்ச்சைக்கு மத்தியில் இந்தத் தீர்மானம் முக்கியத்துவம் பெற்றுள்ளது.
SIR நடைமுறையில் முறைகேடுகள் நடைபெற்றதாகக் கூறி, தலைமைத் தேர்தல் ஆணையர் ஞானேஷ் குமாருக்கு எதிராக எதிர்க்கட்சிகள் தொடர்ந்து விமர்சனங்களை முன்வைத்து வருகின்றன.
இந்தச் சூழலில், அவரைப் பதவி நீக்கம் செய்யக் கோரி கேரள சட்டப்பேரவையில் தீர்மானம் கொண்டுவரப்பட்டது.
இந்தத் தீர்மானத்தில், குற்றச்சாட்டுகளுக்கு உள்ளான தலைமைத் தேர்தல் ஆணையரைப் பதவி நீக்கம் செய்ய வேண்டும் என்றும், முறைகேடாக நீக்கப்பட்டதாகக் கூறப்படும் வாக்காளர்களின் பெயர்களை மீண்டும் பட்டியலில் சேர்க்க வேண்டும் என்றும் வலியுறுத்தப்பட்டுள்ளது.
மேலும், தேர்தல் ஆணையர்களைத் தேர்வு செய்யும் குழுவில் பிரதமர், எதிர்க்கட்சித் தலைவர் மற்றும் உச்சநீதிமன்றத் தலைமை நீதிபதி ஆகியோர் இடம்பெறும் வகையில் தேர்வுக் குழுவை மாற்றியமைக்க வேண்டும் என்றும் கோரிக்கை முன்வைக்கப்பட்டுள்ளது.
இந்தத் தீர்மானத்துக்கு காங்கிரஸ் மற்றும் மார்க்சிஸ்ட் கம்யூனிஸ்ட் உள்ளிட்ட கட்சிகள் ஆதரவு தெரிவித்ததாகக் கூறப்படுகிறது. அதேவேளையில், பாஜகவைச் சேர்ந்த மூன்று சட்டமன்ற உறுப்பினர்கள் தீர்மானத்துக்கு எதிர்ப்பு தெரிவித்தனர்.
இதையடுத்து, பேரவையில் பெரும்பான்மை அடிப்படையில் தீர்மானம் நிறைவேற்றப்பட்டதாகத் தெரிவிக்கப்பட்டுள்ளது.
கேரள சட்டப்பேரவையில் தீர்மானம் நிறைவேற்றப்பட்டிருப்பது மட்டும் தலைமைத் தேர்தல் ஆணையர் ஞானேஷ் குமாரைப் பதவி நீக்கம் செய்துவிடாது.
இந்திய அரசியலமைப்பின்படி, தலைமைத் தேர்தல் ஆணையரைப் பதவி நீக்கம் செய்வதற்குத் தனிப்பட்ட நடைமுறை உள்ளது.
எனவே, இந்தத் தீர்மானம் அரசியல் ரீதியாக முக்கியத்துவம் பெற்றாலும், பதவி நீக்கத்துக்கான சட்ட நடைமுறைகள் தனியாகப் பின்பற்றப்பட வேண்டும்.
=================
