ரயில்கள் மற்றும் ரயில் நிலையங்களில் குப்பை போட்டால் விதிக்கப்படும் அபராதம் ரூ.500-ல் இருந்து ரூ.1,000 ஆக உயர்த்தப்பட்டு அரசாணை வெளியிடப்பட்டுள்ளது.
சுகாதாரத்தை மேம்படுத்த கடுமையான நடவடிக்கை
ரயில்கள் மற்றும் ரயில் நிலையங்களைச் சுத்தமாகப் பராமரிக்கத் தொடர்ந்து கோரிக்கைகள் விடுக்கப்பட்டாலும், சில பயணிகள் அவற்றை முறையாகப் பின்பற்றுவதில்லை.
ரயில்களுக்குள் குப்பைத் தொட்டிகள் அமைக்கப்பட்டிருந்தும், தின்பண்டங்களின் பிளாஸ்டிக் கவர்கள் மற்றும் காலியான குடிநீர் பாட்டில்களை இருக்கைகளுக்கு அடியிலும், ஜன்னல் வழியாக வெளியே வீசுவதும் வழக்கமாக உள்ளது. இது சுற்றுச்சூழல் மாசுபாட்டிற்கு முக்கியக் காரணியாக அமைகிறது.
அபராதத் தொகை இரட்டிப்பு
இதனைக் கட்டுப்படுத்த 2012-ஆம் ஆண்டு முதல் ரயில்கள் மற்றும் ரயில் நிலையங்களில் குப்பை போடுபவர்களுக்கு ரூ.500 வரை அபராதம் விதிக்கப்பட்டு வந்தது.
ரூ. 500-ல் இருந்து ரூ. 1000 ஆக உயர்வு
இந்நிலையில், இந்த அபராதத் தொகையை ரூ.500-ல் இருந்து ரூ.1,000-ஆக உயர்த்தி இந்திய ரயில்வே அறிவித்துள்ளது. இது குறித்த அதிகாரப்பூர்வ அறிவிப்பு ஆகஸ்ட் 24-ஆம் தேதியிட்ட மத்திய அரசிதழில் வெளியிடப்பட்டுள்ளது.
பிற நடவடிக்கைகளுக்கும் தடை
குப்பை போடுவது மட்டுமின்றி, ரயில்வே வளாகத்திற்குள்:
எச்சில் துப்புதல்
சிறுநீர் கழித்தல்
குளித்தல்
உணவு சமைத்தல்
போன்ற செயல்களில் ஈடுபடுபவர்கள் மீது கடுமையான விதிகள் பின்பற்றப்பட்டு அபராதம் விதிக்கப்படும் எனக் எச்சரிக்கப்பட்டுள்ளது.
நீதிமன்ற நடவடிக்கை மற்றும் மேலதிக அபராதம்
ரயில்வே நிர்வாகம் விதிக்கும் இந்த அபராதத் தொகையை உடனடியாகச் செலுத்தத் தவறுபவர்கள் மீது சட்டப்பூர்வ நடவடிக்கை எடுக்கப்பட்டு, நீதிமன்றத்தில் ஆஜர்படுத்தப்படுவார்கள்.
அவர்களுக்கு நீதிமன்றத்தின் மூலம் ரூ.2,000 வரை அபராதம் விதிக்கப்படும் என்றும் இந்திய ரயில்வே தெளிவுபடுத்தியுள்ளது.
இதையும் படிங்க : தமிழக பக்தர்கள் நேபாளம் செல்லும் காரணம்? : வைணவம், சைவ ஆன்மிக பயணம், இமயமலை தரிசனம், மானசரோவர் யாத்திரை..!
=====
