‘புகையிலை மற்றும் வேப்ஸ்’ மசோதா
பிரிட்டனில் வருங்காலத் தலைமுறையினரைப் புகையிலை பழக்கத்திலிருந்து முழுமையாகப் பாதுகாக்கும் நோக்கில், ‘புகையிலை மற்றும் வேப்ஸ்’ மசோதா அந்நாட்டு நாடாளுமன்றத்தில் வெற்றிகரமாக நிறைவேற்றப்பட்டுள்ளது.
வாழ்நாள் முழுவதும் சிகரெட் வாங்க முடியாத நிலை
இதன் மூலம், இனிவரும் காலங்களில் ஒரு குறிப்பிட்ட வயதிற்குட்பட்டோர் தங்கள் வாழ்நாள் முழுவதும் சிகரெட் வாங்க முடியாத நிலை உருவாகியுள்ளது.
யாரை பாதிக்கும் இந்தத் தடை?
புதிய சட்டத்தின்படி, 2009-ஆம் ஆண்டு ஜனவரி 1-ம் தேதி அல்லது அதற்குப் பிறகு பிறந்தவர்கள், பிரிட்டனில் சிகரெட் அல்லது புகையிலைப் பொருட்களை வாங்குவதற்கு வாழ்நாள் முழுவதும் தகுதி பெற மாட்டார்கள்.
‘புகையிலையற்ற தலைமுறை’
2027, ஜனவரி 1 முதல் புகையிலை வாங்குவதற்கான குறைந்தபட்ச வயது வரம்பு ஒவ்வொரு ஆண்டும் ஓராண்டு உயர்த்தப்படும். இதன் மூலம் ‘புகையிலையற்ற தலைமுறை’ உருவாக்கப்படும்.
உலகின் இரண்டாவது நாடு!
இத்தகைய கடுமையான சட்டத்தை அமல்படுத்தும் உலகின் இரண்டாவது நாடாக மாலத்தீவு தற்போது உள்ளது. முன்னதாக நியூசிலாந்து இச்சட்டத்தைக் கொண்டு வந்தாலும், 2023-ல் அங்கு ஏற்பட்ட ஆட்சி மாற்றத்தால் அந்தச் சட்டம் ரத்து செய்யப்பட்டது.
இப்போது ஐக்கிய ராச்சியத்தின் அங்க நாடுகளான இங்கிலாந்து, ஸ்காட்லாந்து, வேல்ஸ் மற்றும் வடக்கு அயர்லாந்து ஆகிய அனைத்திலும் இந்த விதிகள் பொருந்தும்.
புதிய சட்டத்தின் முக்கிய அம்சங்கள்
திறந்தவெளி தடை
விளையாட்டு மைதானங்கள், பள்ளிகள் மற்றும் மருத்துவமனைகளுக்கு வெளியே உள்ள பொது இடங்களிலும் புகைப்பிடிக்கத் தடை விதிக்கப்பட்டுள்ளது.
கடுமையான அபராதம்
சில்லறை விற்பனையாளர்களுக்கு அபராதம்: தகுதியற்றவர்களுக்குப் புகையிலை விற்கும் கடைகளுக்குக் கடுமையான நிதி அபராதம் விதிக்கப்படும்.
வேப்பிங் கட்டுப்பாடு
18 வயதுக்கு மேற்பட்டோர் வேப் பொருட்களை வாங்கலாம் என்றாலும், குழந்தைகளைக் கவரும் வகையிலான டிஸ்போசபிள் வேப்ஸ் போன்ற தயாரிப்புகளுக்குத் தடை விதிக்கப்பட்டுள்ளது.
விளம்பரத் தடை
புகையிலை மற்றும் வேப்பிங் தொடர்பான அனைத்து விளம்பரங்களும் முழுமையாகத் தடை செய்யப்படும்.
வாகனங்களுக்குள் தடை
காருக்குள் 18 வயதுக்குட்பட்டவர்கள் இருந்தால், அங்கு வேப்பிங் செய்வது சட்டவிரோதமாக்கப்பட்டுள்ளது.
அனுமதிக்கப்பட்ட இடங்கள்
பொது இடங்களுக்குக் கட்டுப்பாடுகள் விதிக்கப்பட்டாலும், மக்களின் சொந்த வீடுகளில் புகைப்பிடிக்கவோ அல்லது வேப்பிங் செய்யவோ சட்டப்பூர்வ அனுமதி உண்டு.
பப் மற்றும் பார்
அதேபோல், பப்கள் மற்றும் பார்களுக்கு வெளியே ஒதுக்கப்பட்ட பகுதிகளில் புகைப்பிடிக்கத் தொடர்ந்து அனுமதி அளிக்கப்படும்.
பிரிட்டன் வரலாற்றில் மைல்கல்
மன்னர் சார்லஸின் இறுதி ஒப்புதல் கிடைத்தவுடன், இந்தச் சட்டம் அதிகாரப்பூர்வமாக நடைமுறைக்கு வரும். இது பிரிட்டனின் சுகாதார வரலாற்றில் ஒரு மிகப்பெரிய மைல்கல்லாகப் பார்க்கப்படுகிறது.
=====
