உணவும், மனித குலமும்
உணவு என்பது வெறும் பசியைப் போக்குவது மட்டும் கிடையாது. து உயிர்கள் வாழ்வதற்கான அடிப்படை ஆதாரமாக திகழ்கிறது.
நாம் உண்ணும் ஒவ்வொரு பிடி உணவும், உடலுக்கு ஆற்றலை வழங்கி, வாழ்கையை நடத்த உதவுகிறது.
உணவை இறைவனின் அருளாக கருதி, அதற்கு நன்றி செலுத்தும் முக்கிய நாட்களில் ஒன்றுதான் அன்னாபிஷேகம்.
ஐப்பசி அன்னாபிஷேகம்
ஐப்பசி மாதப் பௌர்ணமி அன்று சிவன் கோவில்களில் சிவலிங்கத்துக்கு அன்னத்தால் அபிஷேகமும் அலங்காரமும் செய்யப்பட்டு பூஜை செய்யப்படும்.
ஈசனை தரிசித்தால் பாவம் நீங்கும்
ஐப்பசி அன்னாபிஷேகத்தில் கலந்து கொண்டால், ஈசனை தரிசித்தால் பாவங்கள் நீங்கும் என்பது ஐதீகம்.
ஐப்பசி மாதம் அன்னாபிஷேகம் நாளில் என்ன செய்ய வேண்டும், என்ன செய்யக் கூடாது, எந்த நேரத்தில் வழிபட வேண்டும் என்பது குறித்த முழுமையான விவரங்களை பார்க்கலாம்.
நாளை ஐப்பசி பௌர்ணமி
2026ஆம் ஆண்டு அக்டோபர் 25ஆம் தேதி, ஐப்பசி மாதப் பௌர்ணமி நாளில் அன்னாபிஷேகம் நடைபெறுகிறது. இந்த நாளில் சிவபெருமானை வழிபடுவதற்காகப் பல்வேறு சிவாலயங்களில் சிறப்பு அபிஷேகங்களும் அலங்காரங்களும் செய்யப்படுகின்றன.
வீட்டிலும் அன்னாபிஷேகம்
கோயிலுக்குச் செல்ல முடியாதவர்கள் வீட்டிலேயே எளிமையான முறையில் சிவபெருமானை வழிபடலாம். வீட்டில் சிவலிங்கம் இருந்தால், குடும்ப வழிபாட்டு மரபுக்கும் லிங்கத்தின் தன்மைக்கும் ஏற்ற வகையில் அன்னாபிஷேகம் செய்யலாம்.
அன்னாபிஷேக பூஜை
பச்சரிசியைச் சமைத்து, சாதம் நன்றாக ஆறிய பிறகு வழிபாட்டுக்குப் பயன்படுத்த வேண்டும். சூடான சாதத்தைச் சிவலிங்கத்தின் மீது வைப்பதை தவிர்க்க வேண்டும்.
வீட்டில் உள்ள சிவலிங்கத்தின் அளவுக்கு ஏற்ப ஆறிய சாதத்தைப் படைத்து வழிபடலாம். முறையான அபிஷேகம் செய்வது குறித்து சந்தேகம் இருந்தால், கோயில் அர்ச்சகரின் ஆலோசனையை பெறலாம்.
வீட்டில் சிவலிங்கம் இல்லாதவர்கள் சிவபெருமானின் படம் அல்லது நடராஜரின் படம் முன்பு சாதம், சர்க்கரைப் பொங்கல் அல்லது குடும்ப வழக்கப்படி தயாரித்த உணவை நைவேத்தியமாகப் படைத்து வழிபடலாம்.
காய்கறி, பழங்களை கொண்டு அலங்காரம்
கோயில் மரபுக்கு ஏற்ப சாதத்தின் மீது காய்கறிகள், பழங்கள் மற்றும் பிற உணவுப் பொருட்களைக் கொண்டு அலங்காரம் செய்யலாம். வீட்டில் வழிபடும்போது இவை கட்டாயமில்லை; எளிமையாகவும் பக்தியுடனும் வழிபடலாம்.
எளிமையாகவும் வழிபடலாம்
வீட்டில் எதும் செய்ய இயலாதவர்கள், அருகில் உள்ள சிறிய சிவன் கோயிலுக்கு அரை கிலோ பச்சரிசி வாங்கித் தரலாம் அல்லது இயன்ற சிறிய அளவில் வழிபாட்டை மேற்கொள்ளலாம்.
அபிஷேகம் முடிந்த பிறகு, சிவபுராணம், தேவாரம், திருவாசகம் அல்லது பன்னிரு திருமுறைப் பாடல்களைப் பாராயணம் செய்ய வேண்டும். சாதம் ஒன்றிரண்டு மணி நேரம் சுவாமியிடம் அப்படியே இருக்கட்டும்.
அதன் பிறகு அந்த அன்னத்தைத் தயிர் கலந்து பிரசாதமாக வீட்டிலுள்ளவர்களுக்கு வழங்கலாம்.
அருகில் குளம் அல்லது ஏரி போன்ற நீர்நிலைகள் இருப்பின், நீர் வாழ் பிராணிகளுக்காக அன்னத்தின் ஒரு பகுதியை அங்கே சேர்க்கலாம்.
அக்டோபர் 25, 2026, ஞாயிற்றுக்கிழமை
காலை: 11:30 மணி முதல் 12:00 மணிக்குள்
மதியம்: பிற்பகல் 1:35 மணி முதல் 2:30 மணி வரை
மாலை: மாலை 6:00 மணிக்குப் பிறகு
===================
