

சபரிமலை சீசன் தொடக்கம்
2026-27ம் ஆண்டுக்கான மண்டல, மகரவிளக்கு சீசன் நேற்று தொடங்கியது.
இதற்காக 16ம் தேதி மாலை 5 மணிக்கு கோவில் நடை திறக்கப்பட்டது. தந்திரி கண்டரரு பிரம்மதத்தன் முன்னிலையில், மேல்சாந்தி ஈ.டி. பிரசாத் நம்பூதிரி நடையைத் திறந்து தீபம் ஏற்றினார்.
மாலை அணியும் பக்தர்கள்
கார்த்திகை மாதம் தொடங்கியதும் பக்தர்கள் 41 நாட்கள் விரதம் இருந்து, இருமுடி கட்டி ஐயப்பனை தரிசிக்க சபரிமலைக்குச் செல்வார்கள்.
நாட்டின் பல்வேறு பகுதிகளில் இருந்தும் லட்சக்கணக்கான பக்தர்கள் வருகை தருவார்கள்.
18 மணி நேரம் கோவில் நடை திறப்பு
எனவே பக்தர்களின் வசதிக்காக கோவில் நடை தினமும் 18 மணி நேரம் பக்தர்கள் சாமி தரிசனம் செய்ய ஏற்பாடு செய்யப்பட்டுள்ளது.
அதன்படி, அதிகாலை 3 மணிக்கு நடை திறக்கப்படும். காலை நேர பூஜைகள் மற்றும் நெய்யபிஷேகம் உள்ளிட்ட வழிபாடுகள் நடைபெறும்.
மதியம் 1 மணிக்கு நடை அடைக்கப்பட்டு, பிற்பகல் 3 மணிக்கு மீண்டும் திறக்கப்படும். இரவு 11 மணிக்கு ஹரிவராசனம் பாடப்பட்ட பிறகு நடை அடைக்கப்படும்.
தினமும் 80 ஆயிரம் பக்தர்கள்
பக்தர்கள் கூட்டத்தைக் கட்டுப்படுத்தும் வகையில், இந்த சீசனில் தினமும் அதிகபட்சமாக 80 ஆயிரம் பேருக்கு தரிசன அனுமதி வழங்கப்பட்டுள்ளது.
இதில் 66 ஆயிரம் இடங்கள் ஆன்லைன் விர்ச்சுவல் கியூ முன்பதிவு மூலமாகவும், 14 ஆயிரம் இடங்கள் ஸ்பாட் புக்கிங் மூலமாகவும் ஒதுக்கப்பட்டுள்ளன.
ஸ்பாட் புக்கிங் வசதி
நிலக்கல், எருமேலி, வண்டிப்பெரியாறு சத்திரம் ஆகிய இடங்களில் ஸ்பாட் புக்கிங் வசதிக்கு ஏற்பாடு செய்யப்பட்டுள்ளது.
நிலக்கல்லில் 10 ஆயிரம் பேருக்கும், எருமேலியில் 2 ஆயிரம் பேருக்கும், வண்டிப்பெரியாறு சத்திரத்தில் 2 ஆயிரம் பேருக்கும் முன்பதிவு அடிப்படையில் அனுமதி வழங்கப்படும்.
பம்பையில் ஸ்பாட் புக்கிங் வசதி கிடையாது.
டிசம்பர் 27 மண்டல பூஜை
டிசம்பர் 27ஆம் தேதி மண்டல பூஜை நடைபெறுகிறது. இதையடுத்து கோவில் நடை அடைக்கப்பட்டு, மகரவிளக்கு வழிபாட்டுக்காக டிசம்பர் 30ஆம் தேதி மாலை மீண்டும் திறக்கப்படும்.
ஜனவரி 14 மகரவிளக்கு பூஜை
ஜனவரி 14ஆம் தேதி மகரவிளக்கு மற்றும் மகரஜோதி தரிசனம் நடைபெற உள்ளது. ஜனவரி 19ஆம் தேதி வரை பக்தர்கள் தரிசனம் செய்ய அனுமதிக்கப்படுவார்கள்.
ஜனவரி 20ஆம் தேதி காலை கோவில் நடை அடைக்கப்படுவதுடன் 2026-27ஆம் ஆண்டுக்கான மண்டல, மகரவிளக்கு சீசன் நிறைவு பெறுகிறது.
=====