17 கைதிகள் தப்பியோட்டம்
தேனி மாவட்டம் தேக்கம்பட்டியில் உள்ள மாவட்ட சிறையிலிருந்து கடந்த திங்கட்கிழமை இரவு, ஒரே அறையில் அடைக்கப்பட்டிருந்த 17 கைதிகளில் ஒருவர், தனக்கு வலிப்பு நோய் ஏற்பட்டது போல் நடித்து நாடகமாடினார்.
இதை உண்மை என நம்பி சிறை வார்டன் கதவைத் திறந்து உள்ளே சென்ற போது, அவரைத் தாக்கி சாவியைப் பறித்துக் கொண்டு வெளிக்கதவைத் திறந்து அனைத்துக் கைதிகளும் தப்பியோடினர்.
9 போலீசார் சஸ்பெண்ட்
இச்சம்பவத்தில் காயமடைந்த சிறைக் காவலர் தங்கபாண்டி மருத்துவமனையில் அனுமதிக்கப்பட்டார். கவனக்குறைவாகச் செயல்பட்டதாக 9 சிறைத் துறைப் பணியாளர்கள் பணியிடை நீக்கம்செய்யப்பட்டனர்.
தீவிர தேடுதல் வேட்டை
தப்பியோடிய கைதிகளைப் பிடிக்க தென்மண்டல ஐ.ஜி. விஜயேந்திர பிதாரி மற்றும் தேனி எஸ்.பி. பிரவீன் கெளதம் தலைமையில் 17 தனிப்படைகள் அமைக்கப்பட்டன.
மதுரை, திண்டுக்கல் மற்றும் அண்டை மாநிலமான கேரளாவின் இடுக்கி எல்லைகளில் 16-க்கும் மேற்பட்ட சோதனைச் சாவடிகள் அமைக்கப்பட்டு தீவிர வாகனத் தணிக்கை மேற்கொள்ளப்பட்டது.
15 பேர் பிடிபட்டனர்
செவ்வாய்க்கிழமை காலை 5 கைதிகள் பிடிபட்ட நிலையில், மாலையில் சிறையின் பின்புறமுள்ள அடர்ந்த காட்டுப் பகுதியில் பதுங்கியிருந்த மேலும் 8 கைதிகளை ட்ரோன் கேமராக்கள் (Drones) உதவியுடன் போலீஸ் தனிப்படை சுற்றி வளைத்துக் கைது செய்தது.
2 பேர் சரண் அடைந்தனர்
நேற்று காலையில் ரெஜின் மற்றும் பொன்முத்துச்செல்வம் ஆகிய இருவர் பிடிபட்டனர். மற்ற இரண்டு பேரையும் சுட்டுப் பிடிக்க உத்தரவு பிறப்பிக்கப்பட்ட நிலையில், தலைமறைவாக இருந்த மதுரை மாவட்டத்தைச் சேர்ந்த சகோதரர்களான திருப்பதி மற்றும் மீனாட்சிசுந்தரம் வேறு வழியின்றி கம்பம் வடக்கு காவல் நிலையத்தில் சரணடைந்தனர்.
17 பேரும் சிறைகளில் அடைப்பு
இதன் மூலம் தப்பியோடிய 17 கைதிகளும் முழுமையாகப் பிடிபட்டுவிட்டதாகத் தென்மண்டலக் காவல்துறை அதிகாரப்பூர்வமாக அறிவித்துள்ளது. பிடிபட்ட கைதிகள் அனைவரும் பலத்த பாதுகாப்புடன் மீண்டும் சிறைக்குக் கொண்டு செல்லப்பட்டனர்.
48 மணி நேர தேடுதல் வேட்டை நிறைவு
48 மணி நேரத்திற்கும் மேலாக மேற்கொள்ளப்பட்ட தேடுதல் வேட்டையானது முடிவுக்கு வந்து இருக்கிறது. இவர்கள் தப்பிக்க யார் காரணம், தூண்டி விட்டது யார்? பின்னணி என்பது பற்றி அறிய விசாரணை முடுக்கி விடப்பட்டுள்ளது.
தேனி சம்பவத்தை தொடர்ந்து. தமிழ்நாடு முழுவதும் உள்ள சிறைகளில் கண்காணிப்பு தீவிரப்படுத்தப்பட்டுள்ளது.
===================
