தமிழக அரசியல் வரலாற்றில் ஒரு பெரும் மாற்றத்தை ஏற்படுத்தியுள்ள தமிழக வெற்றிக் கழகம், 108 இடங்களைக் கைப்பற்றி ஆட்சிக் கட்டிலில் அமர்ந்துள்ளது. தமிழக முதல்வர் விஜய் தலைமையிலான இந்த அமைச்சரவையில் மொத்தம் ஒன்பது அமைச்சர்கள் இடம்பெற்றுள்ளனர்.
அனுபவமும், இளமையும் கலந்த இந்த அமைச்சரவையில் கே.ஏ. செங்கோட்டையனைத் தவிர மற்ற எட்டு பேரும் முதல்முறையாக அமைச்சர் பொறுப்பை ஏற்றுள்ளனர் என்பது குறிப்பிடத்தக்கது.
என் ஆனந்த் முதல் கீர்த்தனா வரை தமிழக அமைச்சர்கள் பற்றிய சுவாரஸ்ய தகவல்களை பார்க்கலாம்.
1. என். ஆனந்த் (பொதுச் செயலாளர்)
புதுச்சேரி புஸ்ஸி தொகுதியின் முன்னாள் சட்டமன்ற உறுப்பினரான இவர், கடந்த 20 ஆண்டுகளுக்கும் மேலாக விஜய்யின் நிழலாக இருந்து வருபவர். அகில இந்திய விஜய் ரசிகர் மன்றத்தின் தலைவராக இருந்து, அதனை ஒரு வலுவான நற்பணி இயக்கமாக மாற்றியவர்.
தவெக தொடங்கப்பட்டபோது அதன் அச்சாணியாகச் செயல்பட்ட இவர், 2026 தேர்தலில் சென்னை தி.நகர் தொகுதியில் போட்டியிட்டு வெற்றி பெற்று தற்போது அமைச்சராகியுள்ளார்.
2. ஆதவ் அர்ஜுனா
தேசிய அளவிலான கூடைப்பந்து வீரராகத் தனது பயணத்தைத் தொடங்கி, பின் தேர்தல் வியூக வகுப்பாளராக (Election Strategist) பரிணமித்தவர். திமுக மற்றும் விசிக ஆகிய கட்சிகளில் பணியாற்றிய அனுபவம் கொண்ட இவர், தவெகவின் கொள்கைகளை வடிவமைப்பதில் முக்கியப் பங்காற்றினார்.
வில்லிவாக்கம் தொகுதியில் முதல்முறையாகப் போட்டியிட்டு வெற்றி பெற்று, தற்போது அமைச்சரவையில் முக்கிய இடத்தைப் பிடித்துள்ளார்.
3. மருத்துவர் அருண்ராஜ்
நாமக்கல் மாவட்டத்தைச் சேர்ந்த இவர், எம்ஜிஆர் மருத்துவப் பல்கலைக்கழகத்தில் எம்பிபிஎஸ் முடித்தவர். முன்னாள் ஐ.ஆர்.எஸ் (IRS) அதிகாரியான இவர், வருமான வரித்துறையில் கூடுதல் ஆணையராகப் பணியாற்றியவர்.
2025-ல் தனது பதவியைத் துறந்து தவெக-வில் இணைந்தார். கட்சியின் கொள்கை பரப்பு பொதுச்செயலாளராகவும், விஜய்யின் நெருங்கிய அரசியல் ஆலோசகராகவும் அறியப்படுகிறார்.
4. கே.ஏ. செங்கோட்டையன்
தவெக அமைச்சரவையின் மிகவும் மூத்த மற்றும் அனுபவம் வாய்ந்த முகம். அதிமுகவில் ஒன்பது முறை சட்டமன்ற உறுப்பினராகவும், பலமுறை அமைச்சராகவும் பணியாற்றியவர்.
2025-ல் அதிமுகவிலிருந்து விலகி தவெக-வில் இணைந்த இவருக்கு, அக்கட்சியின் உயர்மட்ட மாநில நிர்வாகக்குழு தலைமை ஒருங்கிணைப்பாளர் பொறுப்பு வழங்கப்பட்டது.
தனது கோட்டையான கோபிசெட்டிபாளையம் தொகுதியில் மீண்டும் வெற்றி பெற்று அமைச்சராகப் பொறுப்பேற்றுள்ளார்.
5. வெங்கடரமணன்
தமிழக வெற்றிக் கழகத்தின் மாநிலப் பொருளாளரான இவர், சென்னை மைலாப்பூர் தொகுதியிலிருந்து சட்டமன்ற உறுப்பினராகத் தேர்ந்தெடுக்கப்பட்டுள்ளார்.
கட்சியின் நிதி நிர்வாகத்தைச் செம்மையாகக் கவனித்து வந்த இவருக்கு, தற்போது அமைச்சரவையிலும் முக்கியப் பொறுப்பு வழங்கப்பட்டுள்ளது.
6. சிடிஆர் நிர்மல்குமார்
பாஜக மற்றும் அதிமுகவில் சமூக ஊடகப் பிரிவுத் தலைவராகப் பணியாற்றிய அனுபவம் கொண்டவர். தவெக-வில் மாநில இணைச் செயலாளராகப் பொறுப்பேற்ற இவர், கட்சியின் கருத்துக்களை ஊடகங்களில் வலிமையாகப் பதிவு செய்பவர்.
பரபரப்பான திருப்பரங்குன்றம் தொகுதியில் போட்டியிட்டு வெற்றி பெற்று அமைச்சராகியுள்ளார்.
7. ராஜ்மோகன் ஆறுமுகம்
ஊடகத்துறையிலிருந்து அரசியலுக்கு வந்தவர். தவெக-வின் கொள்கை பரப்புச் செயலாளரான இவர், தனது அனல் பறக்கும் பேச்சால் இளைஞர்களைக் கவர்ந்தவர்.
எழும்பூர் தனித் தொகுதியில் போட்டியிட்டு வெற்றி பெற்ற இவருக்கு, சமூகப் பிரச்சனைகளில் உள்ள ஆழ்ந்த ஞானத்தைக் கருதி விஜய் அமைச்சர் பொறுப்பை வழங்கியுள்ளார்.
8. மருத்துவர் பிரபு
சிவகங்கை மாவட்டம் காரைக்குடி தொகுதியில் நாம் தமிழர் கட்சியின் ஒருங்கிணைப்பாளர் சீமானை எதிர்த்துப் போட்டியிட்டு வெற்றி பெற்றவர்.
'மிஷன் 2030' என்ற பெயரில் காரைக்குடிக்கு எனத் தனித்துவமான 15 செயல்திட்டங்களை வைத்துள்ள இவர், "தவறு செய்ய மாட்டேன்" என்ற உறுதிமொழியுடன் அரசியலில் தனித்துத் தெரிகிறார்.
9. கீர்த்தனா
தமிழகத்தின் மிக இளம் வயது அமைச்சர் என்ற பெருமையைப் பெற்றுள்ளார் கீர்த்தனா. சிவகாசி தொகுதியின் முதல் பெண் சட்டமன்ற உறுப்பினர் இவராவார்.
பன்மொழிப் புலமை கொண்ட இவர், முன்னதாக பிரசாந்த் கிஷோரின் அரசியல் ஆலோசனை நிறுவனத்தில் பணியாற்றி, பல்வேறு கட்சிகளுக்குத் தேர்தல் வியூகங்களை வகுத்துக் கொடுத்த அனுபவம் கொண்டவர்.
புதிய அமைச்சரவையின் இந்தப் பயணமானது தமிழகத்தின் வளர்ச்சிப் பாதையில் ஒரு புதிய மைல்கல்லாக அமையும் என அரசியல் விமர்சகர்கள் கருதுகின்றனர்.
=====
