”விஜய் முதல்வரானது மகிழ்ச்சி” : விளையாட்டில் தமிழகம் சாதிக்க முழு முயற்சி எடுப்பார் : நடிகர் அஜித்குமார் பாராட்டு...!

லண்டனில் முதல்வர் விஜய்

முதல்வர் விஜய் அரசுமுறைப் பயணமாக லண்டன் சென்றிருக்கிறார். தமிழ்நாட்டிற்கான முதலீடுகளை ஈர்க்க தொழில்துறை பிரதிநிதிகளை சந்திக்க இருக்கும் அவர், நடிகர் அஜித்குமார் பங்கேற்கும் கார் பந்தயத்தை இன்று தொடங்கி வைக்கிறார்.

சர்வதேச கார் பந்தயம்

இங்கிலாந்தின் புகழ்பெற்ற சில்வர்ஸ்டோன் சர்வதேச ரேசிங் சர்க்யூட் பாதையில் 'மிச்செலின் லீ மேன்ஸ் கோப்பை' கார் பந்தயத் தொடர், நடைபெறுகிறது. போட்டியின் தொடக்க நிகழ்வில் தமிழக முதல்வர் விஜய் சிறப்பு விருந்தினராகப் பங்கேற்று, பச்சைக்கொடி அசைத்துப் பந்தயத்தைத் தொடங்கி வைக்கிறார்.

பந்தயக் களத்தில் நடிகர் அஜித்குமார்

அதே பந்தயக் களத்தில் நடிகர் அஜித்குமார் போட்டியாளராக கலந்து கொள்கிறார்.இது குறித்து செய்தியாளர்களைச் சந்தித்த நடிகர் அஜித்குமார், "திரைத்துறையில் நாங்கள் சக நடிகர்களாக இருக்கிறோம்.

விஜய் முதல்வரானது மகிழ்ச்சி

விஜய் முதலமைச்சர் ஆனதில் எனக்கு மிகுந்த மகிழ்ச்சி. தமிழ்நாட்டில் விளையாட்டுத் துறையை மேம்படுத்த விஜய் தலைமையிலான அரசு பல்வேறு நடவடிக்கைகளை மேற்கொள்கிறது.

பிசியான பணிச் சூழலுக்கிடையே, என்னுடைய அழைப்பின் பேரில் லீ மேன்ஸ் கோப்பை கார் பந்தய தொடரை தொடங்கிவைக்க முதல்வர் விஜய் லண்டன் வந்துள்ளார்.

விளையாட்டுத்துறை - முதல்வர் ஆர்வம்

விளையாட்டு துறையை மேம்படுத்துவதற்காக அவர் நிறைய செய்கிறார். லண்டனில் உள்ள 'சில்வர் ஸ்டோன்' ரேஸிங் டிராக் போன்றதை சென்னையில் உருவாக்க அவர் ஆர்வம் காட்டி வருகிறார்.

சென்னையிலும் சர்வதேச போட்டிகள்

மோட்டார் ஸ்போர்ட்ஸ் போன்ற அனைத்தும் இந்தியாவில் வர வேண்டும் என்பதே என் விருப்பம். லண்டனில் நடப்பது போன்ற போட்டிகள் சென்னையில் நடைபெற வேண்டும் என்ற ஆசை இருக்கிறது" என்று அஜித்குமார் தெரிவித்தார்.

அஜித் ரெட்ஆண்ட் பை விராஜ்

இந்த பந்தயத் தொடரில், 'அஜித் ரெட்ஆண்ட் பை விராஜ்' (Ajith RedAnt by Virage) அணியின் சார்பில் அஜித்குமார் களம் இறங்குகிறார்.

சக போட்டியாளர் ரோமைன் வோஸ்னியாக் (Romain Vozniak) உடன் இணைந்து, LMP3 Pro/Am பிரிவில் 'நம்பர் 16 லிஜியர் JS P325' (Ligier JS P325) ரகப் பந்தயக் காரை அஜித் இயக்கவுள்ளார்.

நரேன் கார்த்திகேயன், ஆதித்யா பட்டேல்

இவர்களுடன் இந்தியாவின் நட்சத்திர ரேஸ் வீரர்களான நரேன் கார்த்திகேயன் மற்றும் ஆதித்யா பட்டேல் ஆகியோரும் LMP3 பிரிவில் பங்கேற்றுப் போட்டியிடுகின்றனர்.

தமிழ்நாட்டிலும் 'ஸ்போர்ட்ஸ் சிட்டி'

தமிழ்நாட்டில் உலகத்தரம் வாய்ந்த 'ஸ்போர்ட்ஸ் சிட்டி' மற்றும் 'மோட்டார் ஸ்போர்ட்ஸ் சிட்டி' அமைப்பதற்கான தீவிர முயற்சிகளில் தவெக அரசு ஈடுபட்டு வருவது குறிப்பிடத்தக்கது.

======================