Chennai Amma Unavagam Daily Users Cross 1 Lakh Greater Chennai Corporation Report
பெருநகர் சென்னை மாநகராட்சிக்கு உட்பட்ட பகுதிகளில் ஏழை எளிய மக்களின் பசியைப் போக்கி வரும் அம்மா உணவகங்களைப் பயன்படுத்துவோரின் எண்ணிக்கை தற்போது மிகக் கணிசமாக அதிகரித்துள்ளதாக சென்னை மாநகராட்சி அதிகாரப்பூர்வமாகத் தெரிவித்துள்ளது.
383 இடங்களில் சேவை – என்னென்ன உணவு எவ்வளவு விலை?
சென்னை மாநகராட்சி நேற்று (ஜூலை 17) வெளியிட்டுள்ள அறிக்கையின்படி, சென்னை மாநகரத்தின் மொத்தமுள்ள 383 இடங்களில் தற்போது அம்மா உணவகங்கள் தடையின்றி செயல்பட்டு வருகின்றன. இந்தத் திட்டத்தின் கீழ் மிகக் குறைந்த விலையில் தரமான உணவுகள் பின்வருமாறு வழங்கப்பட்டு வருகின்றன:
காலை நேரம்: ஒரு இட்லி 1 ரூபாய்க்கும், பொங்கல் 5 ரூபாய்க்கும் வழங்கப்படுகிறது.
மதிய நேரம்: சாம்பார் சாதம், எலுமிச்சை சாதம் மற்றும் கருவேப்பிலை சாதம் ஆகியவற்றுடன் தயிர் சாதம் 3 ரூபாய்க்கும் வழங்கப்படுகிறது.
மாலை நேரம்: இரண்டு சப்பாத்திகள் 3 ரூபாய்க்கு வழங்கப்பட்டு வருகிறது.
பயனாளிகள் எண்ணிக்கை மற்றும் வருவாய் கிடுகிடு உயர்வு
அம்மா உணவகங்களை மேம்படுத்தி, மக்களுக்குத் தரமான உணவுகளைத் தடையின்றி வழங்கிட அரசு மேற்கொண்ட தொடர் நடவடிக்கைகளின் காரணமாக, பயனாளிகள் எண்ணிக்கை மற்றும் வருவாய் பின்வருமாறு புதிய உச்சத்தைத் தொட்டுள்ளது:
பயனாளிகள் எண்ணிக்கை உயர்வு
கடந்த ஏப்ரல் மாதத்தில் தினசரி சராசரியாக 67,164 பயனாளிகள் அம்மா உணவகங்களில் சாப்பிட்டு வந்த நிலையில், தற்போது அந்த எண்ணிக்கை தினசரி சராசரியாக 1,04,102 பேராக அதிகரித்துள்ளது.
வருவாய் அதிகரிப்பு
கடந்த ஏப்ரல் மாதத்தில் அம்மா உணவகங்களின் வாயிலாக ரூ.87,60,489 வருவாய் மட்டுமே பெறப்பட்ட நிலையில், பயனாளிகள் எண்ணிக்கை அதிகரித்ததன் காரணமாக தற்போது அது ரூ.1,35,78,548 ஆக உயர்ந்துள்ளது.
யாருக்கெல்லாம் பெரும் உதவி?
சென்னை மாநகரில் வாழும் ஏழை எளிய மக்கள், கூலி வேலை செய்பவர்கள், ஆட்டோ ஓட்டுநர்கள், கட்டிடத் தொழிலாளர்கள், பாரம் தூக்குபவர்கள் என குறைந்த ஊதியத்தில் பணிபுரிபவர்களுக்கும், சென்னைக்கு வேலை நிமித்தமாக வந்து செல்பவர்களுக்கும் இந்த அம்மா உணவகங்கள் வாழ்வாதாரமாக விளங்குகின்றன.
மேலும், சென்னை மாநகராட்சிக்கு உட்பட்ட அனைத்து வார்டுகளிலும், குறிப்பாக ராயபுரம், அண்ணாநகர் மற்றும் தேனாம்பேட்டை ஆகிய 3 மண்டலங்களில் உள்ள 7 அரசு மருத்துவமனைகளிலும் நோயாளிகள் மற்றும் அவர்களின் துணைக்கு வருபவர்கள் பயன்பெறும் வகையில் இந்த உணவகங்கள் மிகச் சிறப்பான முறையில் சேவை வழங்கி வருவதாக அந்த அறிக்கையில் கூறப்பட்டுள்ளது.
=====
