மதுராந்தகம், தாராபுரம் இடைத்தேர்தல்
சட்டப்பேரவை தேர்தலில் அதிமுக சார்பில் போட்டியிட்டு மதுராந்தகம் (தனி) தொகுதியில் வெற்றி பெற்ற மரகதம் குமரவேல், தாராபுரம் (தனி) தொகுதியில் வெற்றி பெற்ற சத்யபாமா இருவரும் தங்கள் எம்எல்ஏ பதவியை ராஜினாமா செய்தனர். பின்னர் தவெகவில் இணைந்தனர்.
இந்நிலையில், மதுராந்தகம், தாராபுரம் ஆகிய இரு தொகுதிகளுக்கும் இடைத்தேர்தல் நடத்துவதற்கான அறிவிப்பை தேர்தல் ஆணையம் வெளியிட்டு, அக்டோபர் 6ம் தேதி வாக்குப்பதிவு நடைபெற இருக்கிறது.
மதுராந்தகம் தொகுதி வேட்பாளர்கள்
மதுராந்தகம் தொகுதியில் தவெக சார்பில் மரகதம் குமரவேல், திமுக சார்பில் பரந்தாமன், அதிமுக சார்பில் கணிதா சம்பத், மார்க்சிஸ்ட் கம்யூனிஸ்ட் சார்பில் சுகந்தி, நாம் தமிழர் கட்சி சார்பில் ஜானகிராமன் மற்றும் சுயேட்சி வேட்பாளர்கள் என 28 பேர் களத்தில் உள்ளனர்.
தாராபுரம் தொகுதி வேட்பாளர்கள்
தாராபுரம் தொகுதியில் தவெக சார்பில் சத்யபாமா, திமுக சார்பில் சுகன்யா, அதிமுக சார்பில் பானுமதி, இந்திய கம்யூனிஸ்ட் கட்சி சார்பில் லட்சுமணன், நாதக சார்பில் கார்த்திகா உள்ளிட்டோர் போட்டியிடுகின்றனர்.
முதல்வர் விஜய் பிரசாரம்
தவெக வேட்பாளரை ஆதரித்து முதல்வர் விஜய் செப்.25-ம் தேதியும் நேற்றும் மதுராந்தகம் தொகுதியில் பிரச்சாரம் செய்தார். முதல் நாள் பொதுக்கூட்டத்தில் உரையாற்றிய அவர் நேற்று, சாலைவலம் வந்து வாக்கு சேகரித்தார்.
கடந்த 30ம் தேதி தாராபுரம் தொகுதியில் பிரச்சாரம் செய்த முதல்வர், மீண்டும் நாளை அங்கு பிரச்சாரத்துக்கு செல்கிறார்.
மு.க. ஸ்டாலின் பிரச்சாரம்
திமுக வேட்பாளர்களுக்கு ஆதரவாக கட்சித் தலைவர் மு.க.ஸ்டாலின், இளைஞரணி செயலாளர் உதயநிதி தீவிர வாக்கு சேகரிப்பில் ஈடுபட்டு வருகிறார்கள்
எடப்பாடி பழனிசாமி பரப்புரை
அதிமுக வேட்பாளர்களை ஆதரித்து அக்கட்சியின் பொதுச் செயலாளர் எடப்பாடி பழனிசாமி பரப்புரை மேற்கொண்டு வருகிறார்.
கம்யூனிஸ்ட் வேட்பாளர்களுக்கு வாக்கு கேட்டு அக்கட்சிகளின் மாநில நிர்வாகிகளும் பிரச்சாரம் செய்கின்றனர். நாதக தலைமை ஒருங்கிணைப்பாளர் சீமான், இரு தொகுதிகளிலும் தீவிர பிரச்சாரம் மேற்கொண்டு வருகிறார்.
நாளை ஓய்கிறது பிரச்சாரம்
தவெக. திமுக, அதிமுக கூட்டணி கட்சிகளின் தலைவர்களும் தொடர்ந்து பிரச்சாரத்தில் ஈடுபட்டு வரும் நிலையில், இரு தொகுதிகளிலும் இடைத்தேர்தல் பிரச்சாரம் நாளை மாலை 6 மணியுடன் நிறைவடைகிறது.
இதனால், இறுதிக்கட்ட வாக்கு சேகரிப்பில் வேட்பாளர்களும் கட்சி நிர்வாகிகளும் தீவிரம் காட்டி வருகின்றனர்.
6ம் தேதி வாக்குப்பதிவு
அக்.6-ம் தேதி வாக்குப்பதிவும், 9-ம் தேதி வாக்கு எண்ணிக்கையும் நடைபெறுகிறது. வாக்குப்பதிவையொட்டி இரண்டு தொகுகளிலும் பலத்த பாதுகாப்பு ஏற்பாடுகள் செய்யப்பட்டு உள்ளன.
இரண்டு தொகுதிகளிலும் போட்டி கடுமையாக இருக்கும் நிலையில் யாருக்கு வெற்றி என்ற எதிர்பார்ப்பு மேலோங்கி இருக்கிறது.
=================
