அண்ணாமலையின் மக்கள் இயக்கம்
பாஜகவின் முன்னாள் மாநிலத் தலைவரான அண்ணாமலை, அண்மையில் தான் தொடங்கியுள்ள 'வீ த லீடர்ஸ்' (We The Leaders) மக்கள் இயக்கம் குறித்தும், உறுப்பினர் சேர்க்கை நிலவரம் மற்றும் தனது அரசியல் பயணத்தின் தொடக்கப்புள்ளி குறித்தும் தனது சொந்த கிராமத்துத் தோட்டத்திலிருந்து உணர்வுப்பூர்வமாகப் பேசியுள்ளார்.
பொதுமக்கள், இளைஞர்கள் ஆர்வம்
பாஜகவில் இருந்து விலகிய பின்னர், கடந்த ஜூன் 5-ஆம் தேதி அண்ணாமலையால் 'வீ த லீடர்ஸ்' என்ற புதிய அரசியல் இயக்கம் தொடங்கப்பட்டது. இந்த இயக்கத்தில் இணைந்து புதியதொரு அரசியல் மாற்றத்தை உருவாக்குமாறு பொதுமக்கள், இளைஞர்கள் மற்றும் தாய்மார்களுக்கு அவர் அழைப்பு விடுத்திருந்தார்.
18 லட்சம் பேர் சேர்ந்தனர்
இந்த நிலையில், இயக்கம் தொடங்கப்பட்ட மிகக் குறுகிய நாட்களிலேயே, எந்தவித எதிர்பார்ப்பும் இன்றி சுமார் 18 லட்சம் பேர் தற்பொழுது இந்த மக்கள் இயக்கத்தில் தங்களை இணைத்துக் கொண்டுள்ளதாக அண்ணாமலை அதிகாரப்பூர்வமாக அறிவித்துள்ளார்.
யாரையும் அழைக்கவில்லை
இந்த இயக்கத்தை முற்றிலும் ஒரு மக்கள் இயக்கமாக மட்டுமே முன்னெடுக்க வேண்டும் என்று தான் விரும்பியதால், தனது முந்தைய கட்சியான பாஜகவைச் சேர்ந்த தலைவர்கள், தொண்டர்கள், தனது நண்பர்கள் அல்லது உறவினர்கள் என யாருக்கும் தனிப்பட்ட முறையில் தொலைபேசி வாயிலாகத் தொடர்பு கொண்டு இந்த இயக்கத்தில் சேருமாறு தான் எந்தவொரு அழைப்பும் விடுக்கவில்லை என்று அவர் திட்டவட்டமாகத் தெரிவித்துள்ளார்.
மக்கள் பேராதரவோடு பயணம்
மக்களின் பேராதரவோடு இந்த இயக்கம் மிகச் சரியான பாதையில் பயணித்து வருவதாகவும் அவர் குறிப்பிட்டுள்ளார். இந்தியாவிலேயே முதன்முறையாக இந்த இயக்கத்தில் இணைவதற்கு 'OTP' அடிப்படையிலான இணையதள உறுப்பினர் சேர்க்கை முறை (OTP based membership registration) அறிமுகப்படுத்தப்பட்டுள்ளது.
இணையதள வழிப்பதிவு
பலரும் எளிமையான 'Missed Call' முறையைப் பயன்படுத்தலாமே என்று தனக்குக் கோரிக்கை விடுத்த போதினும், மக்கள் தங்களைப் பற்றிய விபரங்களையும், தங்களது அரசியல் விருப்பங்களையும் பதிவு செய்யும் வகையிலான ஒரு முறையான செயல்முறையை (Process) உருவாக்கவே இந்த இணையதள வழிப் பதிவை தான் தேர்ந்தெடுத்ததாக, அண்ணாமலை விளக்கியுள்ளார்.
உள்ளாட்சி தேர்தலில் போட்டி
இந்த உறுப்பினர் சேர்க்கையின் மூலம், ஆயிரக்கணக்கான நண்பர்கள் வரவிருக்கும் உள்ளாட்சித் தேர்தலில் போட்டியிட விருப்பம் தெரிவித்துள்ளதாகவும், லட்சக்கணக்கானோர் எந்த பதவியும் இன்றி சாதாரணத் தொண்டர்களாக இருந்து இந்த இயக்கத்தை அரசியல் கட்சியாக மாற்றி மக்களுக்கு நல்ல அரசியலை வழங்க விரும்புவதாகவும் நெகிழ்ச்சியுடன் குறிப்பிட்டுள்ளார்.
ஜூலையில் தீவிரமடையும் மக்கள் இயக்கம்
தற்பொழுது இயக்கமாகச் செயல்பட்டு வரும் இந்த அமைப்பின் அரசியல் நகர்வுகள் மற்றும் களப்பணிகள் வரும் ஜூலை மாதம் முதல் புதிய வடிவத்தில் மக்கள் மத்தியில் தீவிரமடையும் என்றும் அவர் உறுதியளித்துள்ளார்.
கிராம நினைவுகள் - என்றும் பசுமையானது
தான் பிறந்து, வளர்ந்து, இருபது ஆண்டுகளுக்கும் மேலாக வாழ்ந்த இந்த இடமே தனது வாழ்க்கையின் மிக முக்கியமான பகுதி என்று நெகிழ்ந்தார்.
பத்து ஆண்டுகளுக்கு முன்பு வரை மாடுகள், ஆடுகள் கட்டப்பட்டிருந்த இந்த விவசாயக் களத்தில்தான் தான் கயிற்றுக் கட்டில் போட்டுத் தூங்குவது வழக்கம் என்றும், பள்ளிப் பருவத்தில் சைக்கிளில் சென்று பேருந்து பிடித்துப் படித்த நினைவுகளையும், இதே களத்தில் அமர்ந்து வீட்டுப்பாடம் (Homework) எழுதிய பழைய நினைவுகளையும் அவர் பகிர்ந்துகொண்டார்.
’அண்ணாமலை’ அரசியல் ரகசியம்
ஒவ்வொரு மனிதரின் வாழ்க்கையிலும் ஏதோ ஒரு குறிப்பிட்ட தருணம் அல்லது ஒரு சின்னப் பொறி (Spark) அவர்களைச் சிவில் சர்வீஸ், அரசியல் அல்லது மக்கள் சேவை போன்ற பொதுவாழ்வை நோக்கித் திருப்பும் என்று குறிப்பிட்ட அவர், 'அண்ணாமலை' என்ற தனி மனிதனை அரசியலுக்கு வரத் தூண்டிய அந்தத் திருப்புமுனைத் தருணம் குறித்தும் தனது பேட்டியின் வாயிலாக விரிவாகப் பகிர்ந்துள்ளார் அண்ணாமலை.
================
