"Caste, non-religion certificate" should be enacted: actor Parthiban filed a case in Madras High Court!
சாதி, மதமற்றவர் எனச் சான்றிதழ் பெற விரும்புவோருக்கு உடனடியாகச் சான்றிதழ் வழங்கும் வகையில் சட்டம் இயற்றத் தமிழக அரசுக்கு உத்தரவிடக் கோரி, நடிகர் பார்த்திபன் சென்னை உயர்நீதிமன்றத்தில் பொதுநல மனு தாக்கல் செய்துள்ளார்.
வழக்கும் பின்னணியும்
சென்னை உயர்நீதிமன்ற உத்தரவின் அடிப்படையில், கடந்த ஏப்ரல் மாதம் 'சாதி, மதமற்றவர்' என்ற சான்றிதழைப் பெற்ற நடிகர் பார்த்திபன், நீதிபதி தண்டபாணி முன் நேரில் ஆஜராகி அச்சான்றிதழைக் காண்பித்தார்.
நீங்கள் மட்டும் பயனடைந்தால் போதுமா?
அப்போது, "நீங்கள் மட்டும் பயனடைந்தால் போதாது. இதுபோலச் சான்றிதழ் கோரி விண்ணப்பிக்கும் பொதுமக்களும் பயனடைய வேண்டும்" என நீதிபதி குறிப்பிட்டதைத் தொடர்ந்து, தற்போது இந்தப் பொதுநல வழக்கை அவர் தாக்கல் செய்துள்ளார்.
மனுவில் குறிப்பிடப்பட்டுள்ள அம்சங்கள்
சாதி, மதமற்றவர் எனச் சான்றிதழ் கோரும் விண்ணப்பங்களைப் பரிசீலிக்கும் வகையில் வருவாய்த்துறை அதிகாரிகளுக்குத் தகுந்த அறிவுறுத்தல்களையும் அரசாணைகளையும் பிறப்பிக்கத் தமிழக அரசுக்கு உயர்நீதிமன்றம் கடந்த 2025-ஆம் ஆண்டு ஜூன் மாதம் உத்தரவிட்டிருந்தது.
சட்டம் இயற்றக் கோரிக்கை
அப்போதைய சூழலில் அரசாணைகளுக்கு ஒப்புதல் அளிக்கும் விவகாரத்தில் ஆளுநருக்கும் அரசுக்கும் இடையே சுமுகமான உறவு இல்லாததால் அவ்வுத்தரவு கிடப்பில் போடப்பட்டது. தற்போது அதுபோன்ற சூழல் நிலவவில்லை என்பதால், இதற்குத் தனியாகச் சட்டம் இயற்ற அரசுக்கு உத்தரவிட வேண்டும் என மனுவில் கோரப்பட்டுள்ளது.
இவ்வழக்கு தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் ஆகியோர் அடங்கிய அமர்வில், ஆகஸ்ட் 3-ஆம் தேதி விசாரணைக்கு வரவுள்ளது.
திரைத்துறை நிகழ்வில் சர்ச்சையும் வருத்தமும்
கடந்த ஆண்டு ஹைதராபாத்தில் நடைபெற்ற திரைத்துறை நிகழ்ச்சி ஒன்றில் பேசிய நடிகர் பார்த்திபன், தனது சாதி குறித்துப் பேசியது பெரும் விமர்சனத்திற்குள்ளானது.
"தான் ஒரு நாயுடு பையன், சென்னையில் பிறந்து வளர்ந்ததால் தெலுங்கு அவ்வளவாக வராது" என்று நடிகர் பார்த்திபன் பேசியிருந்தார். அப்பேச்சு சர்ச்சையை ஏற்படுத்தியதைத் தொடர்ந்து, அதற்கு அவர் மன்னிப்பு கோரியது குறிப்பிடத்தக்கது.
=====
