CM Vijay Distributes Cake To School Students Childrens Day
குழந்தைகள் தின சிறப்புத் திட்டம்
நாளை (சனிக்கிழமை) நவம்பர் 14-ஆம் தேதி நாடு முழுவதும் குழந்தைகள் தினம் கொண்டாடப்படவுள்ள நிலையில், முன்னெப்போதும் இல்லாத வகையில் இந்த ஆண்டு தமிழ்நாடு முழுவதும் உள்ள அரசு மற்றும் அரசு உதவிபெறும் பள்ளிகளில் பயிலும் மாணவர்களுக்கு இனிப்பு கேக் வழங்க தமிழ்நாடு அரசு ஏற்பாடு செய்துள்ளது.
இதற்காக மொத்தம் 61 லட்சத்து 84 ஆயிரத்து 566 மாணவர்களுக்குத் தலா 45 கிராம் எடையுள்ள கேக் வழங்க ரூ. 9.27 கோடி மதிப்பில் டெண்டர் விடப்பட்டு, முன்னணி நிறுவனங்கள் மூலம் கேக்குகள் கொள்முதல் செய்யப்பட்டுள்ளன.
கொளத்தூர் பள்ளியில் திட்டத்தை நேரில் தொடங்கி வைத்த முதல்வர் விஜய்
இத்திட்டத்தைத் தொடங்கி வைக்கும் விதமாக இன்று (நவம்பர் 13) சென்னை கொளத்தூரில் உள்ள அரசு நடுநிலைப் பள்ளிக்கு நேரில் சென்ற முதலமைச்சர் விஜய், மாணவ-மாணவிகளுக்குத் தனது கையால் கேக் துண்டுகளையும் குழந்தைகள் தின வாழ்த்து அட்டைகளையும் வழங்கி அவர்களுடன் அன்போடு கலந்துரையாடினார்.
நலத்திட்டப் பணிகளை தொடங்கி வைக்கும் முதல்வர்
கொளத்தூர் தொகுதி த.வெ.க. எம்.எல்.ஏ. வி.எஸ். பாபு மருத்துவமனையில் சிகிச்சை பெற்று வருவதால், முதல்வர் விஜய்யே நேரில் சென்று இந்த திட்டத்தைத் தொடங்கி வைத்ததோடு தொகுதியில் நலத்திட்டப் பணிகளையும் மேற்கொள்ள உள்ளார்.
இதே நேரத்தில் சென்னை மாநகராட்சிப் பகுதிகளில் உள்ள 2.90 லட்சம் மாணவர்கள் உட்படத் தமிழகம் முழுவதும் 61.84 லட்சம் மாணவர்களுக்கும் கேக் துண்டுகள் விநியோகிக்கப்பட்டு வருகின்றன.
வாழ்த்து அட்டையில் இடம்பெற்ற நெகிழ்ச்சி வாசகம்
மாணவர்களுக்கு வழங்கப்பட்ட குழந்தைகள் தின வாழ்த்து அட்டையில், "இனிய குழந்தைகள் தின நல்வாழ்த்துக்கள், All is well, Confident-ஆ இருங்க, பிரியமுடன் விஜய்" என அச்சிடப்பட்டிருந்தது. முதல்வரின் இந்த அன்பான வாசகம் பள்ளி மாணவர்களிடையே பெரும் உற்சாகத்தையும் நெகிழ்ச்சியையும் ஏற்படுத்தியுள்ளது.
===============