'ஒருமுறையாவது ரேஷன் அரிசியை நாம் சமைத்து சாப்பிட்டிருப்போமா?' - சட்டப்பேரவையில் ஆதவ் அர்ஜூனா கேள்வி!

"Have we ever cooked and eaten ration rice even once?" – Aadhav Arjuna asks in the Legislative Assembly!

தமிழக சட்டப்பேரவையில் பட்ஜெட் கூட்டத்தொடரின் போது, ரேஷன் அரிசி விநியோகம், விவசாயக் கடன் தள்ளுபடி மற்றும் நெல், கரும்பு கொள்முதல் விலைகள் தொடர்பாக ஆளுங்கட்சிக்கும் எதிர்க்கட்சிக்கும் இடையே விவாதம் நடைபெற்றது.

பேரவையில் அமைச்சர்களின் விவாதம்

உணவுத்துறை அமைச்சர் வெங்கடராமன் "திமுக ஆட்சியில் ரேஷன் கடைகளில் விநியோகிக்கப்பட்ட அரிசி பயன்பாட்டிற்கு உகந்ததாக இல்லை என்றும், கால்நடைகளுக்குத் தீவனமாகப் போடப்பட்டதாகவும் மக்கள் தெரிவித்தனர்.

தஞ்சாவூர், செங்கல்பட்டு மாவட்டங்களில் கொள்முதல் நிலையங்கள் கட்சி நிர்வாகிகளால் திறக்கப்பட்டன. எங்கள் ஆட்சியில் ரேஷன் கடைகளில் விநியோகிக்கப்படும் பொருட்கள் அதிகளவில் கொள்முதல் செய்யப்பட்டுள்ளன" என்று குறிப்பிட்டார்.

திமுக முன்னாள் அமைச்சர் பதில்

இதற்கு பதிலளித்த திமுக முன்னாள் அமைச்சர் சக்கரபாணி, "திமுக ஆட்சியில் 4,000 இடங்களில் நெல் நேரடி கொள்முதல் நிலையங்கள் திறக்கப்பட்டன. அரிசி ஆலைகள் தரம் உயர்த்தப்பட்டு, பழுப்பு இல்லாத அரிசி மக்களுக்கு வழங்கப்பட்டது" என்றார்.

எம்.ஆர்.கே. பன்னீர்செல்வம் மற்றும் எ.வ. வேலு

இதனைத்தொடர்ந்து, திமுக ஆட்சியில் தான் கருப்பு அரிசி விநியோகம் ஒழிக்கப்பட்டதாக எம்.ஆர்.கே. பன்னீர்செல்வம் தெரிவித்தார். வட மாவட்டங்களில் கரும்பு உற்பத்தி குறைந்துள்ளது உண்மைதான் என்றும், தயாரிப்பு விலையும் விற்பனை விலையும் ஒத்துப்போகாததால் வெளிநாடுகளில் இருந்து சர்க்கரை இறக்குமதி செய்யப்படுவதாகவும் எ.வ. வேலு சுட்டிக்காட்டினார்.

ஆதவ் அர்ஜூனா எழுப்பிய கேள்விகளும் விளக்கங்களும்

"இலவச ரேஷன் அரிசியை முன்னாள் அமைச்சர் உட்பட நாம் ஒருமுறையாவது சமைத்துச் சாப்பிட்டிருப்போமா? முன்னாள் அமைச்சர் சக்கரபாணி தான் சாப்பிட்டுள்ளாரா?" என கேள்வி எழுப்பிய அமைச்சர் ஆதவ் அர்ஜுனா, மக்களுக்குத் தரமான அரிசியை வழங்க வேண்டும் என முதல்வர் உத்தரவிட்டுள்ளதாகத் தெரிவித்தார்.

விவசாயக் கடன் தள்ளுபடி

வாக்குறுதியில் கூறியபடி முதல்வர் ரூ. 5,932 கோடி விவசாயக் கடனை தள்ளுபடி செய்துள்ளார். ஆனால் திமுக தனது தேர்தல் வாக்குறுதியில் விவசாயக் கடன் தள்ளுபடி குறித்து அறிவிக்கவில்லை.

கொள்முதல் விலை உயர்வு

சன்ன ரக நெல்லுக்கு ரூ. 2,750 ஆக உயர்த்தி விநியோகிக்க முதல்வர் உத்தரவிட்டுள்ளார். மேலும், கரும்பு உற்பத்தி குறைந்துள்ள நிலையிலும், விவசாயிகளை அழைத்து ஆலோசித்து கரும்புக்கு ரூ. 4,000 ஆக விலை உயர்த்தப்பட்டுள்ளது.

இந்த ஆட்சியில் கரும்பு உற்பத்தியில் தமிழ்நாடு முதன்மை மாநிலமாக மாறும் என்றும், விவசாயிகளின் பொற்கால ஆட்சியாக இது இருக்கும் என்றும் ஆதவ் அர்ஜூனா குறிப்பிட்டார்.

======