Heroic Act by Police Constable: Gutkha Smugglers Caught After 40 km Chase
காரில் தொங்கியபடி காவலரின் சாகசப் பயணம்
கோவை மாவட்டம், கோவில்பாளையம் காவல் துறையினர் விளாங்குறிச்சி பகுதியில் வாகனச் சோதனையில் ஈடுபட்டிருந்தனர். அப்போது கர்நாடகா பதிவு எண் கொண்ட காரைச் சோதனையிட முயன்றபோது, காரின் பின்பகுதியில் மூட்டைகள் இருப்பது தெரியவந்தது.
தப்ப முயன்ற கடத்தல்காரர்கள்
எஸ்.ஐ விக்னேஷ் மற்றும் தலைமை காவலர் வேல்முருகன் ஆகியோர் சோதனையிட முயன்றபோது, கடத்தல்காரர்கள் எஸ்.ஐ-யைக் கீழே தள்ளிவிட்டுத் தப்ப முயன்றனர். உடனே சுதாரித்துக் கொண்ட தலைமை காவலர் வேல்முருகன், காரின் மேற்பகுதியில் பாய்ந்து படுத்துக்கொண்டார்.
40 கி.மீ தொலைவு காரின்மேல் பகுதியில் பயணித்த காவலர்
காரை நிறுத்தாமல் கடத்தல்காரர்கள் விளாங்குறிச்சியிலிருந்து காளப்பட்டி வழியாக அவினாசி சாலை, நீலாம்பூர், கணியூர், கருமத்தம்பட்டி, தெக்கலூர் வரை அதிவேகமாகச் சென்றபோதிலும், சுமார் 40 கிலோ மீட்டர் தொலைவு காரின் மேல் படுத்தபடியே பயணித்துத் தனது துணிச்சலை வெளிப்படுத்தினார்.
காவல்துறையினரின் முற்றுகை மற்றும் கைது
இது குறித்து நீலாம்பூர், கருமத்தம்பட்டி, அவினாசி காவல் நிலையங்களுக்கு உடனடியாகத் தகவல் தெரிவிக்கப்பட்டது. தகவலறிந்து விரைந்து செயல்பட்ட அவினாசி நெடுஞ்சாலை ரோந்து-11 காவலர்கள், அவினாசி பகுதியில் உள்ள தனியார் ஹோட்டல் முன்பாக அந்த வாகனத்தைச் சுற்றி வளைத்து மடக்கிப் பிடித்தனர்.
பின்னர் அந்த வாகனத்தை சோதனை செய்ததில், தமிழக அரசால் தடை செய்யப்பட்ட குட்கா பொருட்கள் கடத்தி வரப்பட்டது உறுதி செய்யப்பட்டது.
விசாரணையில் வெளியான தகவல்கள்
கைது செய்யப்பட்ட மூன்று நபர்களிடமும் நடத்திய தீவிர விசாரணையில், அவர்கள் ராஜஸ்தான் மாநிலத்தைச் சேர்ந்தவர்கள் என்றும், கர்நாடக மாநிலம் பெங்களூருவில் இருந்து தமிழகத்தில் தடை செய்யப்பட்ட குட்கா பொருட்களைக் கடத்தி வந்து கோவை பகுதிகளில் விற்பனை செய்ய முயன்றதும் தெரியவந்ததுள்ளது.
டிஜிபி பாராட்டு
ஆபத்தான சூழ்நிலையிலும் துணிச்சலுடனும் சமயோசிதமாகவும் செயல்பட்டு குற்றவாளிகளைப் பிடித்த முதல் நிலைக் காவலர் வேல்முருகனின் வீரம் மற்றும் கடமை உணர்வை தமிழ்நாடு காவல் துறை தலைமை இயக்குநர் Dr. மகேஷ் குமார் அகர்வால், IPS வெகுவாகப் பாராட்டியுள்ளார்.
=======
