அரசு அலுவலகங்களில் லஞ்சத்தைக் கட்டுப்படுத்த ஊழியர்களின் கையிருப்பு ரொக்கப் பணத்தைப் பதிவு செய்ய உயர் நீதிமன்ற மதுரை கிளை மற்றும் கன்னியாகுமரி ஆட்சியர் சுற்றறிக்கை.
சென்னை உயர் நீதிமன்ற மதுரை கிளை உத்தரவு
கன்னியாகுமரியில் அரசு ஊழியர் ஒருவர் தொடர்பான வழக்கில், சென்னை உயர் நீதிமன்ற மதுரை கிளை முக்கிய உத்தரவு ஒன்றை பிறப்பித்துள்ளது.
அனைத்து பணப் பரிவர்த்தனைகளும் டிஜிட்டல் முறையில் சாத்தியமாகியுள்ள தற்போதைய சூழலில், அரசு ஊழியர்கள் அலுவலகத்திற்கு தங்கள் சொந்தப் பயன்பாட்டிற்காக கொண்டு வரும் ரொக்கப் பணத்திற்கு குறிப்பிட்ட வரம்பை நிர்ணயிக்க வேண்டும் எனத் தெரிவித்துள்ளது.
லஞ்சத்தைக் கட்டுப்படுத்த, ஊழலற்ற நிர்வாகத்தை அமைக்க
இத்தகைய நிபந்தனைகள் அரசு அலுவலகங்களில் லஞ்சத்தைக் கட்டுப்படுத்தவும், ஊழலற்ற நிர்வாகத்தை அமைக்கவும் உதவும் என்றும், இது குறித்த தெளிவுபடுத்தல்களை அரசு செப்டம்பர் 3-க்குள் தெரிவிக்க வேண்டும் என்றும் நீதிமன்றம் தனது உத்தரவில் குறிப்பிட்டுள்ளது.
கன்னியாகுமரி ஆட்சியரின் தீவிர நடவடிக்கை
உயர் நீதிமன்ற உத்தரவின் பின்னணியில், கன்னியாகுமரி மாவட்ட ஆட்சியர் பிரதாப் கடந்த மாதம் வெளியிட்ட சுற்றறிக்கை தற்போது மாநிலம் முழுவதும் கவனம் பெற்று வருகிறது. அந்த சுற்றறிக்கையில் கூறப்பட்டுள்ள முக்கிய வழிகாட்டுதல்கள்:
ரொக்கப் பணப் பதிவேடு
அரசுத் துறைகள் மற்றும் நிறுவனங்களில் பணியாற்றும் அலுவலர்கள் மற்றும் பணியாளர்கள், தினமும் தங்கள் கையிருப்பில் வைத்துள்ள ரொக்கப் பணத்தின் விவரத்தைப் பிரத்யேகப் பதிவேட்டில் பதிவு செய்ய வேண்டும்.
அலுவலகத் தலைவர் ஒப்புதல்
இந்த விவரங்களுக்கு அலுவலகத் தலைவரிடம் கையொப்பம் பெறப்பட வேண்டும். வருகைப் பதிவேட்டுடன் சேர்த்து, சம்மந்தப்பட்ட கண்காணிப்பாளரால் இப்பதிவேடு பாதுகாக்கப்பட்டுப் பராமரிக்கப்பட வேண்டும்.
மாதாந்திர ஆய்வு
உயர் அதிகாரிகள் மாதத்திற்கு இரண்டு முறை இந்தப் பதிவேட்டை நேரில் ஆய்வு செய்ய வேண்டும்.
தேவைக்கு அதிகமான பணம் தவிர்த்தல்
அனைத்து ஊழியர்களும் தேவைக்கு அதிகமான ரொக்கப் பணத்தைக் கையிருப்பில் வைத்திருப்பதைத் தவிர்க்க வேண்டும்.
துறை ரீதியான நடவடிக்கை
ரொக்கப் பணப் பதிவேட்டை முறையாகப் பராமரிக்காத அலுவலகத்தின் தலைவர், கண்காணிப்பாளர் மற்றும் வருகைப் பதிவேட்டைப் பராமரிக்கும் பணியாளர் மீது துறை ரீதியான கடுமையான நடவடிக்கை எடுக்கப்படும்.
======
