கன்னியாகுமரி மாவட்டத்தில் விஜயதசமி கொண்டாட்டம் கோலாகலம்: ஸ்ரீ வனமாலீஸ்வரர் கோயிலில் 'வித்யாரம்பம்'ஏடு தொடங்கும் நிகழ்வு!

Nagercoil Vidyarambham Vijayadasami Celebrations Kanyakumari

கன்னியாகுமரி மாவட்டம் நாகர்கோவில் பார்வதிபுரம் ஸ்ரீ வனமாலீஸ்வரர் கோயிலில் விஜயதசமியை முன்னிட்டு குழந்தைகள் ஏடு தொடங்கும் வித்யாரம்பம் நிகழ்ச்சி கோலாகலமாக நடைபெற்றது.

விஜயதசமியின் முக்கியத்துவம்

கல்வி, தொழில், கலை என எந்தவொரு புதிய முயற்சியைத் தொடங்கினாலும் விஜயதசமி நாளில் தொடங்கினால் அது மென்மேலும் வளர்ச்சி அடையும் என்பது மக்களின் பாரம்பரிய நம்பிக்கையாகும்.

அந்த வகையில், விஜயதசமி திருநாளை முன்னிட்டு கன்னியாகுமரி மாவட்டம் நாகர்கோவிலில் குழந்தைகளுக்கான முதல் எழுத்து அறிவைப் புகட்டும் 'வித்யாரம்பம்' எனப்படும் ஏடு தொடங்குதல் நிகழ்ச்சி மிகவும் கோலாகலமாக நடைபெற்றுள்ளது.

வனமாலீஸ்வரர் கோயிலில் ஏடு தொடங்கும் சடங்கு

நாகர்கோவில் பார்வதிபுரத்தில் அமைந்துள்ள ஸ்ரீ வனமாலீஸ்வரர் கோயிலில் உள்ள சரஸ்வதி சன்னிதானத்தில் சிறப்பு ஏற்பாடுகள் செய்யப்பட்டிருந்தன.

அதிகாலையிலேயே ஆயிரக்கணக்கான பெற்றோர்கள் தங்களது குழந்தைகளுடன் கோயிலுக்கு வருகை தந்தனர். சரஸ்வதி தேவியின் சன்னிதானத்திற்கு முன்பாக, குருக்களின் மடியில் குழந்தைகளை அமரவைத்து, தங்க ஊசியால் அவர்களின் நாவில் 'அகர முதல' எழுத்துகள் எழுதப்பட்டன.

அதனைத் தொடர்ந்து, தாம்பாளத்தில் பரப்பி வைக்கப்பட்டிருந்த பச்சரிசியில் குழந்தைகளின் பிஞ்சு விரல்களைப் பிடித்து 'அ' என்ற முதல் எழுத்தை எழுதச் செய்து அவர்களின் கல்விப் பயணம் மங்களகரமாகத் தொடங்கி வைக்கப்பட்டது.

குமரி மாவட்டக் கோயில்களில் சிறப்பு வழிபாடுகள்

பார்வதிபுரம் வனமாலீஸ்வரர் கோயில் மட்டுமின்றி, புகழ்பெற்ற கன்னியாகுமரி பகவதி அம்மன் கோயில், நாகர்கோவில் நாகராஜா கோயில், ஐயப்பன் கோயில் உள்ளிட்ட பல்வேறு திருக்கோயில்களிலும் வித்யாரம்பம் நிகழ்ச்சிகள் வெகு விமரிசையாக நடைபெற்றன.

நேற்றைய தினம் (19/10/2026) வணிக நிறுவனங்கள் மற்றும் வாகன நிறுத்தங்களில் ஆயுதபூஜை சிறப்பு வழிபாடுகள் நடைபெற்ற நிலையில், இன்று விஜயதசமியை முன்னிட்டு அனைத்து பிரதான கோயில்களிலும் பக்தர்களின் கூட்டம் வழக்கத்தை விட மிக அதிகமாகக் காணப்பட்டது.

கேரள மாநில பக்தர்களின் வருகை

தமிழ்நாடு பஞ்சாங்க நடைமுறைப்படி விஜயதசமி பண்டிகையும் வித்யாரம்பமும் இன்றே கொண்டாடப்படுகிறது. ஆனால், கேரள மாநில அரசு காலண்டர் மற்றும் பாரம்பரியப் பஞ்சாங்க கணிப்பின்படி, விஜயதசமி நிகழ்வுகள் நாளை நடைபெறவுள்ளன.

இருப்பினும், தமிழகத்தின் எல்லை மாவட்டமான கன்னியாகுமரியில் இன்றே விழா கோலாகலமாகத் தொடங்கியதால், எல்லைப்புற கேரளாவைச் சேர்ந்த ஏராளமான பெற்றோர் தங்கள் குழந்தைகளுடன் வந்து இன்றே ஏடு தொடங்கும் சடங்கை நிறைவேற்றினர்.

தேதி மற்றும் திதியில் சிறு வேறுபாடுகள் இருந்தாலும், கல்வி மீதான பக்தியும் நம்பிக்கையும் எல்லையைக் கடந்தது என்பதை இந்நிகழ்வு உணர்த்தியுள்ளது.

==============