புதிய தலைமைச் செயலகத்திற்காக வீடுகள் இடிக்கப்படுகிறதா? : மீனவர்கள் எதிர்ப்பு... அரசு தரப்பு விளக்கம்?

New Secretariat Construction Pattinapakkam Demolition Protest

சென்னையில் புதிய தலைமைச் செயலகம் அமைப்பதற்கான திட்டம் ஏற்கெனவே பல்வேறு விவாதங்களையும் சர்ச்சைகளையும் ஏற்படுத்தியிருக்கிறது.

முதல்வர் விஜய்யின் அறிவிப்பு

ஒருபக்கம், சென்னை பட்டினப்பாக்கத்தில் புதிய தலைமைச் செயலகம் 1200 கோடியில் கட்டப்படும் என்று முதல்வர் விஜய் சட்டசபையில் அறிவித்த நாள் முதலாக புதிய தலைமைச் செயலகம் கட்டுவதற்கான இடம் தேர்வு, கட்டுமானத் திட்டம், அதற்கான செலவுகள் என விவாதங்கள் தொடர்ந்து கொண்டிருந்தன. கடும் எதிர்ப்புகளைத் தொடர்ந்து அரசு தரப்பில் இதற்கான நடவடிக்கைகள் கிடப்பில் போடப்பட்டன.

இப்போது இந்த விவகாரத்தில் புதிதாக ஒரு சர்ச்சை வெடித்திருக்கிறது.

மயிலாப்பூர் பகுதியில் உள்ள தமிழ்நாடு வீட்டு வசதி வாரியத்தின் 96 குடியிருப்புகளை இடிப்பதற்காக ஒப்பந்தப்புள்ளி கோரப்பட்டுள்ளது.

இதற்கு எதிர்ப்பு தெரிவித்துள்ள மீனவ கிராமப் பஞ்சாயத்தார்கள், தங்களுடைய மறுவாழ்வுக்காகக் கோரப்பட்ட நிலத்தில் கட்டிடங்களை இடிக்க அரசு முயற்சிப்பதாகக் குற்றம்சாட்டி உள்ளனர். மேலும் தங்களது கோரிக்கைகள் ஏற்கப்படாவிட்டால் போராட்டம் நடத்துவோம் என்றும் எச்சரித்திருக்கிறார்கள்.

அப்படியென்ன இந்த 96 குடியிருப்புகளில் பிரச்சனை? புதிய தலைமைச் செயலகத் திட்டத்துக்கும் இந்த இடிப்புக்கும் என்ன தொடர்பு? மீனவர்கள் முன்வைக்கும் கோரிக்கைகள் என்ன? அரசு தரப்பில் இதற்கு என்ன விளக்கம் கொடுக்கப்பட்டிருக்கிறது? விரிவாக பார்க்கலாம்.

சென்னை மயிலாப்பூர் கிராமப் பகுதியில், தமிழ்நாடு வீட்டு வசதி வாரியத்துக்கு சொந்தமான நிலத்தில் 96 வாடகைக் குடியிருப்புகள் அமைந்திருக்கின்றன. இந்தக் குடியிருப்புகள் அமைந்துள்ள நிலத்தின் பரப்பளவு சுமார் 3.82 ஏக்கர்.

இந்தக் குடியிருப்புகளும், அங்குள்ள பிற கட்டிடங்களும் இடிக்கப்படுவதற்காகத் தமிழ்நாடு வீட்டு வசதி வாரியத்தின் நந்தனம் கோட்டம் சார்பில் நவம்பர் 2ஆம் தேதி, ஒப்பந்தப்புள்ளி மற்றும் மின்னணு ஏல அறிவிப்பு வெளியிடப்பட்டிருக்கிறது.

இதற்கான குறைந்தபட்ச ஏலத் தொகை 41 லட்சத்து 61 ஆயிரத்து 785 ரூபாய். இதில் ஜிஎஸ்டி சேர்க்கப்படவில்லை.

அதாவது, கட்டிடங்களை இடிப்பதோடு, இடிக்கப்படும் கட்டிடங்களில் இருந்து கிடைக்கும் பொருட்களையும் உள்ளடக்கிய ஒப்பந்தமாக இது பார்க்கப்படுகிறது.

ஒப்பந்த அறிவிப்பும் மீனவர்களின் எதிர்ப்பு குரலும்

இந்த ஒப்பந்த அறிவிப்பு வெளியானதுதான் தற்போது மீனவ கிராமப் பஞ்சாயத்தார்களின் எதிர்ப்புக்குக் காரணமாகியிருக்கிறது.

ஏனென்றால், இந்த 3.82 ஏக்கர் நிலம் வெறும் பழைய கட்டிடங்கள் அமைந்துள்ள பகுதி மட்டுமல்ல; தங்களுடைய நீண்டகால மறுவாழ்வுக்காக ஒதுக்கப்பட வேண்டும் என்று மீனவர்கள் கோரி வரும் இடம் என்கிறார்கள்.

மயிலை, திருவல்லிக்கேணி உள்ளிட்ட பகுதிகளைச் சேர்ந்த மீனவ கிராம மக்கள், பல ஆண்டுகளாகத் தங்களுடைய குடியிருப்பு உரிமை மற்றும் மறுவாழ்வு தொடர்பான கோரிக்கைகளை முன்வைத்து வருகிறார்கள்.

குறிப்பாக, கடற்கரை ஒழுங்குமுறை மண்டல அறிவிக்கை 2019-ன் கீழ், இந்த இடத்தை நீண்டகாலக் குடியிருப்புத் திட்டப் பகுதியாக அறிவிக்க வேண்டும் என்பது அவர்களுடைய முக்கியமான கோரிக்கைகளில் ஒன்று.

மீனவர்கள் முன்வைக்கும் கோரிக்கைகள்

அதாவது, கடலோரப் பகுதிகளில் வாழ்ந்து வரும் மீனவ மக்களின் குடியிருப்புத் தேவைகளைப் பூர்த்தி செய்வதற்காக இந்த நிலத்தைப் பயன்படுத்த வேண்டும் என்பதே அவர்களுடைய வாதம்.

ஆனால், இதே பகுதியில் புதிய தலைமைச் செயலகம் கட்டுவதற்கான அரசாணை வெளியிடப்பட்டிருந்தது தங்களுக்கு அதிர்ச்சியையும் ஏமாற்றத்தையும் ஏற்படுத்தியதாக மீனவர்கள் தெரிவிக்கிறார்கள்.

அந்த அரசாணை இன்னும் ரத்து செய்யப்படாத நிலையில், தற்போது பழைய குடியிருப்புகளை இடிப்பதற்கும் ஒப்பந்தப்புள்ளி கோரப்பட்டிருக்கிறது.

இதனால், தங்களுடைய மறுவாழ்வுக்காகக் கோரப்பட்ட நிலம் வேறு ஒரு திட்டத்துக்காகத் தயார்படுத்தப்படுகிறதோ என்ற சந்தேகம் எழுவதாக அவர்கள் கூறுகிறார்கள்.

அதன் அடிப்படையில் இந்த ஒப்பந்தப்புள்ளியை எதிர்ப்பதற்கு மீனவர்கள் பல்வேறு காரணங்களை முன்வைக்கிறார்கள்.

மீனவர்கள் எழுப்பும் கேள்விகள்

முதலாவதாக, தற்போது இந்தக் குடியிருப்புகளில் யாரும் வசிக்கவில்லை என்று கூறப்படும் நிலையில், அவற்றை உடனடியாக இடிக்க வேண்டிய அவசியம் என்ன என்பது அவர்களுடைய முதல் கேள்வி.

இரண்டாவதாக, கட்டிடங்களை இடிப்பதற்கு முன்பாக அந்த இடத்தின் எதிர்காலப் பயன்பாடு குறித்து ஏன் சம்பந்தப்பட்ட பகுதி மக்களிடமும் கிராமப் பஞ்சாயத்தார்களிடமும் கலந்தாலோசிக்கவில்லை என்று கேட்கிறார்கள்.

மூன்றாவதாக, இடிக்கப்படும் கட்டிடங்களில் இருந்து கிடைக்கக்கூடிய செங்கல், கதவு, ஜன்னல், இரும்புக் கம்பிகள் உள்ளிட்ட பொருட்கள் ஒப்பந்ததாரருக்குச் செல்லும் நிலையில், அவற்றின் மதிப்பு எவ்வாறு கணக்கிடப்பட்டது என்பதையும் வெளிப்படையாகத் தெரிவிக்க வேண்டும் என்கிறார்கள்.

குறிப்பாக, 41.61 லட்சம் ரூபாய் குறைந்தபட்ச ஏலத் தொகை எந்த அடிப்படையில் நிர்ணயிக்கப்பட்டது என்ற கேள்வியையும் எழுப்பியிருக்கிறார்கள்.

மேலும், இந்தப் பகுதி கடற்கரை ஒழுங்குமுறை மண்டலத்தின் கீழ் வருவதால், இடிப்புப் பணிகளுக்கு உரிய அனுமதிகள் பெறப்பட்டுள்ளனவா என்பதையும் தெளிவுபடுத்த வேண்டும் என வலியுறுத்துகிறார்கள்.

அதாவது, கட்டிடங்களை இடிப்பதற்கு முன்பாக சட்ட விதிகள், சுற்றுச்சூழல் பாதிப்புகள், நிலத்தின் எதிர்காலப் பயன்பாடு என அனைத்தும் வெளிப்படையாக இருக்க வேண்டும் என்பதுதான் அவர்களுடைய வாதம்.

இந்த விவகாரத்தில் மீனவர்களின் குற்றச்சாட்டுகள் மட்டுமல்லாமல், தமிழ்நாடு அரசின் தகவல் நம்பகத்தன்மைப் பிரிவும் விளக்கம் ஒன்றை வெளியிட்டிருக்கிறது.

அந்த விளக்கத்தின்படி, இந்த குடியிருப்புகளை காலி செய்யுமாறு ஏற்கெனவே 2022ஆம் ஆண்டு ஜனவரி 19ஆம் தேதி குடியிருப்பாளர்களுக்கு நோட்டீஸ் வழங்கப்பட்டிருக்கிறது.

அதைத் தொடர்ந்து, 2022 ஜூன் 1ஆம் தேதி குடியிருப்புகளுக்கான ஒதுக்கீடு ரத்து செய்யப்பட்டதாகவும் தெரிவிக்கப்பட்டுள்ளது. இதற்கு எதிராகக் குடியிருப்பாளர்கள் நீதிமன்றத்தை அணுகியிருக்கிறார்கள்.

2024 ஏப்ரல் 25ஆம் தேதி, அவர்களுக்கு மாற்றுக் குடியிருப்புகள் வழங்குவது தொடர்பாக நீதிமன்றம் உத்தரவிட்டதாக அரசின் விளக்கத்தில் குறிப்பிடப்பட்டுள்ளது.

தொடர்ந்து தாக்கல் செய்யப்பட்ட ஏழு ரிட் மனுக்களில் வீட்டு வசதி வாரியத்துக்கு சாதகமாகத் தீர்ப்பு வந்ததாகவும், அதை எதிர்த்து 25 பேர் மேல்முறையீடு செய்ததாகவும் தெரிவிக்கப்பட்டுள்ளது.

இந்த மேல்முறையீட்டு வழக்கில், 2026 ஆகஸ்ட் 31ஆம் தேதி 45 நாட்களுக்குள் குடியிருப்புகளை காலி செய்ய நீதிமன்றம் உத்தரவிட்டதாகவும், பின்னர் தாக்கல் செய்யப்பட்ட சிறப்பு அனுமதி மனுவை அக்டோபர் 15ஆம் தேதி உச்ச நீதிமன்றம் தள்ளுபடி செய்ததாகவும் அரசு தரப்பு கூறுகிறது.

ஆக, அரசு தரப்பின் விளக்கம் என்னவென்றால், இந்தக் குடியிருப்புகளை இடிக்கும் நடவடிக்கை திடீரென எடுக்கப்பட்ட முடிவு அல்ல. ஏற்கெனவே நடந்த சட்ட நடவடிக்கைகள் மற்றும் தொழில்நுட்பக் குழுவின் பரிந்துரைகளின் அடிப்படையிலானது என்பதுதான்.

அரசின் இந்த விளக்கம், புதிய தலைமைச் செயலகத்துக்காகவே இந்தக் குடியிருப்புகள் இடிக்கப்படுகின்றன என்ற குற்றச்சாட்டைத் தனியாக உறுதிப்படுத்தவில்லை. அதே நேரத்தில், அந்தத் திட்டத்துக்கும் இந்த நிலத்துக்கும் இடையிலான தொடர்பு குறித்து மக்களிடையே எழுந்திருக்கும் சந்தேகங்களையும் முழுமையாகத் தீர்க்கவில்லை.

இந்த விவகாரத்தில் இன்னொரு முக்கியமான சர்ச்சையும் ஏற்பட்டிருக்கிறது.

புதிய தலைமைச் செயலகத் திட்டம் தொடர்பாக மாவட்ட ஆட்சியர் அலுவலகத்தில் கலந்தாய்வுக் கூட்டம் ஒன்று நடத்தத் திட்டமிடப்பட்டிருந்தது.

ஆனால், அந்தக் கூட்டத்தில் பங்கேற்கப் போவதில்லை என்று முள்ளிக்குப்பம் முதல் மாட்டான்குப்பம் வரையிலான மயிலை, திருவல்லிக்கேணி பகுதி மீனவ கிராமப் பஞ்சாயத்தார்கள் அறிவித்திருக்கிறார்கள்.

இதற்குச் சொல்லப்படும் காரணம் என்ன தெரியுமா? பாதிக்கப்படக்கூடிய அனைத்து மீனவ கிராமப் பஞ்சாயத்தார்களுக்கும் முறையான எழுத்துப்பூர்வ அழைப்பு வழங்கப்படவில்லை என்பதுதான்.

மீன்வளம் மற்றும் மீனவர் நலத்துறைக்கு அறிமுகமான சிலருக்கு மட்டுமே தொலைபேசி வாயிலாகக் கூட்டம் குறித்த தகவல் தெரிவிக்கப்பட்டதாக அவர்கள் குற்றம்சாட்டுகிறார்கள்.

இவ்வளவு முக்கியமான திட்டம் தொடர்பான கூட்டத்தில், பாதிக்கப்படக்கூடிய அனைத்து கிராமங்களின் பிரதிநிதிகளும் பங்கேற்க வாய்ப்பு வழங்கப்பட வேண்டும் என்பது அவர்களுடைய கோரிக்கை.

தங்களுக்கு முறையான அழைப்பு வழங்கப்படாத நிலையில் கூட்டத்தில் பங்கேற்பது சரியானதாக இருக்காது என்றும் தெரிவித்திருக்கிறார்கள்.

அதே நேரத்தில், எதிர்காலத்தில் முறையான எழுத்துப்பூர்வ அழைப்பு வழங்கப்பட்டு அனைத்துக் கிராமப் பஞ்சாயத்தார்களும் பங்கேற்கும் வகையில் கூட்டம் நடத்தப்பட்டால் அதில் பங்கேற்க தயாராக இருப்பதாகவும் கூறியிருக்கிறார்கள்.

இந்த விவகாரத்தில் மயிலைப் பகுதி மீனவ கிராமப் பஞ்சாயத்தார்கள் அரசிடம் முக்கியமான கோரிக்கைகளை முன்வைத்திருக்கிறார்கள்.

முதலாவதாக, 96 குடியிருப்புகளை இடிப்பதற்காக வெளியிடப்பட்ட ஒப்பந்தப்புள்ளி அறிவிப்பு எண் 04/2026-27-ஐ உடனடியாக நிறுத்தி வைக்க வேண்டும்.

இரண்டாவதாக, புதிய தலைமைச் செயலகம் கட்டுவது தொடர்பாக வெளியிடப்பட்ட அரசாணையை ரத்து செய்ய வேண்டும்.

மூன்றாவதாக, கடற்கரை ஒழுங்குமுறை மண்டல விதிகளின்படி உரிய அனுமதிகளைப் பெறாமல் இடிப்புப் பணிகளை மேற்கொள்ளக் கூடாது.

நான்காவதாக, 41.61 லட்சம் ரூபாய் குறைந்தபட்ச ஏலத்தொகை எவ்வாறு நிர்ணயிக்கப்பட்டது என்பதை வெளிப்படையாக அறிவிக்க வேண்டும்.

ஐந்தாவதாக, இந்த 3.82 ஏக்கர் நிலத்தை மீனவ மக்களின் நீண்டகால மறுவாழ்வுக்கான குடியிருப்புத் திட்டப் பகுதியாக அறிவிக்க வேண்டும்.

மேலும், இந்த இடம் தொடர்பாக எந்தவொரு முடிவையும் எடுப்பதற்கு முன்பாகப் பாதிக்கப்படக்கூடிய மக்களிடமும் கிராமப் பஞ்சாயத்தார்களிடமும் முறையாகக் கலந்தாலோசிக்க வேண்டும் என்றும் வலியுறுத்தியிருக்கிறார்கள்.

இந்தக் கோரிக்கைகள் ஏற்கப்படாவிட்டால் ஜனநாயக வழியில் போராட்டங்களை முன்னெடுப்பதுடன், சட்ட ரீதியான நடவடிக்கைகளையும் மேற்கொள்வோம் என்று எச்சரித்திருக்கிறார்கள்.

இந்த 96 குடியிருப்புகள் இடிக்கப்படுமா? மீனவர்களின் மறுவாழ்வுக் கோரிக்கை ஏற்கப்படுமா? புதிய தலைமைச் செயலகத் திட்டத்தின் எதிர்காலம் என்னவாகும்? பொறுத்திருந்து பார்க்கலாம்.

=======