ஜெம் கிரானைட்ஸ் உரிமையாளர் மீது புகார் :
தமிழக அரசியலில் பெரும் பரபரப்பை ஏற்படுத்தியுள்ள ஜெம் கிரானைட்ஸ் உரிமையாளர் வீரமணி மீதான போக்சோ வழக்கு தற்போது அரசியல் மோதலாக மாறியுள்ளது.
ஒரு புறம் தற்போதைய தமிழக அரசு, கடந்த திமுக ஆட்சிக் காலத்தில் இந்த வழக்கு முறையாக விசாரிக்கப்படவில்லை என கேள்வி எழுப்பி வருகிறது.
மறுபுறம் திமுக, வழக்கு ஒருபோதும் கைவிடப்படவில்லை என்றும், ஆதாரங்கள் திரட்டப்படும் வரை விசாரணை ஒத்திவைக்கப்பட்டதாகவும் விளக்கம் அளித்து வருகிறது.
சட்டத்துறை அமைச்சர் சி.டி.ஆர். நிர்மல் குமார், வீரமணி மீதான வழக்கில் வீடியோ ஆதாரங்கள் இருந்தும் நடவடிக்கை எடுக்க தாமதமானது ஏன் என்று கேள்வி எழுப்பியுள்ளார்.
மேலும், இத்தகைய வழக்கில் திமுக ஆட்சிக் காலத்தில் அவர் தப்பியிருந்தால், அதற்கு பின்னால் செல்வாக்கு மிக்க நபர்கள் இருந்திருக்கலாம் என்றும் தெரிவித்துள்ளார்.
அதோடு, “திமுகவின் முக்கியமான பவர் சென்டரை சந்தித்துதான் வீரமணி தப்பியிருக்க முடியும். இல்லையெனில் இந்த வழக்கு ஏன் இவ்வளவு காலம் தாமதப்படுத்தப்பட்டது?” என்று அவர் கேள்வி எழுப்பியதாக தகவல்கள் வெளியாகியுள்ளன.
2025-ஆம் ஆண்டு வீரமணி மீது சிறுமிகள் பாலியல் வன்கொடுமைக்கு ஆளாக்கப்பட்டதாக புகார் பதிவு செய்யப்பட்டது.
விசாரணையின்போது சில வீடியோ ஆதாரங்களும் கைப்பற்றப்பட்டதாக கூறப்பட்டது.
ஆனால், போதிய ஆதாரங்கள் இல்லை எனக் கூறி 2026 பிப்ரவரியில் காவல்துறை இறுதி அறிக்கை தாக்கல் செய்து வழக்கை முடிக்க முயன்றதாக தகவல்கள் வெளியாகின.
பின்னர் சிறப்பு போக்சோ நீதிமன்றம் அந்த அறிக்கையை ஏற்காமல், மீண்டும் விசாரணை நடத்த உத்தரவிட்டது.
இந்த குற்றச்சாட்டுகளுக்கு பதிலளித்த முன்னாள் சட்டத்துறை அமைச்சர் ரகுபதி, ஜெம் வீரமணிக்கும் திமுகவிற்கும் எந்தவித தொடர்பும் இல்லை என்று திட்டவட்டமாக மறுத்துள்ளார்.
“2025 அக்டோபரில் புகார் வந்த மறுநாளே வழக்குப் பதிவு செய்யப்பட்டது.
எங்களுக்கு வேண்டியவராக இருந்திருந்தால் வழக்கை பதிவு செய்வதையே தாமதப்படுத்தியிருப்போம்.
ஆனால் அப்படி எதுவும் நடக்கவில்லை” என்று அவர் கூறியுள்ளார்.
வழக்கில் நடவடிக்கை எடுக்கப்படவில்லை என்ற குற்றச்சாட்டையும் ரகுபதி மறுத்துள்ளார்.
போக்சோ சட்டத்தின் கீழ் நடைபெறும் விசாரணைகளில் பாதிக்கப்பட்டவர்களின் விவரங்கள் மற்றும் முக்கிய தகவல்கள் வெளியே கசியக் கூடாது என்பதால் மிகுந்த கவனத்துடன் செயல்பட்டதாக அவர் விளக்கம் அளித்துள்ளார்.
மேலும், “வழக்கை திரும்பப் பெறுகிறோம் என்று நீதிமன்றத்தில் ஒருபோதும் கூறவில்லை.
புதிய ஆதாரங்கள் கிடைக்கும் வரை காத்திருக்கிறோம் என்றுதான் தெரிவித்தோம்” என்றும் அவர் கூறியுள்ளார்.
திமுக சட்டத்துறை செயலாளர் என்.ஆர். இளங்கோவும், இந்த வழக்கு கைவிடப்படவில்லை என்றும் மேலதிக ஆதாரங்கள் கிடைக்கும் வரை மேல்விசாரணை தற்காலிகமாக ஒத்திவைக்கப்பட்டதாகவும் தெரிவித்துள்ளார்.
மேலும், அமைச்சர் நிர்மல் குமார் அரசியல் லாபத்திற்காக தவறான தகவல்களை பரப்புவதாகவும் அவர் குற்றம்சாட்டியுள்ளார்.
ஜெம் வீரமணி போக்சோ வழக்கு தற்போது குற்றவியல் விசாரணையை தாண்டி, தவெக அரசுக்கும் திமுகவுக்கும் இடையிலான அரசியல் மோதலாக மாறியுள்ளது.
ஒரு தரப்பு, வழக்கு தாமதப்படுத்தப்பட்டதற்கான விளக்கத்தை கோருகிறது. மற்றொரு தரப்பு, வழக்கு ஒருபோதும் கைவிடப்படவில்லை என்றும், போக்சோ வழக்கின் தன்மை காரணமாக தகவல்கள் வெளிப்படுத்தப்படவில்லை என்றும் வாதிடுகிறது.
==================
