Phase 3 Voter List Revision Begins May 30: Work Commences in 16 States and 3 Union Territories
சிறப்பு தீவிர திருத்தம்
இந்தியத் தேர்தல் ஆணையம், நாடு முழுவதும் தகுதியான வாக்காளர்களை உறுதி செய்யவும், போலி வாக்காளர்களை நீக்கவும் மேற்கொண்டு வரும் 'சிறப்பு தீவிர திருத்த' (SIR) பணிகளின் மூன்றாம் கட்டத்தை வரும் மே 30-ஆம் தேதி முதல் தொடங்குகிறது.
பணிகளின் விரிவான விபரங்கள்
இந்த மூன்றாம் கட்டப் பணியானது நாட்டின் 16 மாநிலங்கள் மற்றும் 3 யூனியன் பிரதேசங்களில் விரிவாக நடைபெறவுள்ளது. இதற்காக சுமார் 3.94 லட்சம் வாக்குச்சாவடி நிலை அலுவலர்கள் நியமிக்கப்பட்டுள்ளனர்.
இவர்கள் நேரடியாக 36.73 கோடி வாக்காளர்களின் வீடுகளுக்கே சென்று ஆவணங்களைச் சரிபார்க்கும் பணியில் ஈடுபடுவார்கள்.
மக்கள்தொகை கணக்கெடுப்புடன் இணைந்து செயல்படும்
தற்போது நடைபெற்று வரும் தேசிய மக்கள்தொகை கணக்கெடுப்புப் பணிகளுடன் இணைத்து இந்தப் பணிகளை மேற்கொள்வதன் மூலம், களப்பணியாளர்களைத் தேர்தல் ஆணையம் மிகவும் திறம்படப் பயன்படுத்தத் திட்டமிட்டுள்ளது.
தற்காலிக விலக்கு அளிக்கப்பட்டுள்ள பகுதிகள்
தட்பவெப்ப நிலை மற்றும் புவியியல் காரணங்களைக் கருத்தில் கொண்டு, இமாச்சலப் பிரதேசம், ஜம்மு-காஷ்மீர் மற்றும் லடாக் ஆகிய பகுதிகளில் இந்தப் பணிகள் தற்போது நடைபெறாது என்று தெரிவிக்கப்பட்டுள்ளது.
வாக்காளர் பட்டியல் திருத்தம்
மேலும் அங்கு மக்கள் தொகை கணக்கெடுப்பின் அடுத்தகட்டப் பணிகள் நிறைவடைந்த பின்னரே வாக்காளர் பட்டியல் திருத்தம் தொடங்கும் என்றும் தெரிவிக்கப்பட்டுள்ளது.
அதேபோல், தேசியத் தலைநகரான டெல்லியில் திருத்தப்பட்ட இறுதி வாக்காளர் பட்டியல் வரும் அக்டோபர் 7-ஆம் தேதி வெளியாக உள்ளது.
முந்தைய திருத்தங்களின் அதிரடி முடிவுகள்
வாக்காளர் பட்டியலில் வெளிப்படைத்தன்மையைக் கொண்டு வரும் நோக்கில் கடந்த காலங்களில் நடத்தப்பட்ட திருத்தங்கள் மிகப்பெரிய மாற்றங்களை ஏற்படுத்தியுள்ளன.
முதற்கட்டமாக
அதன்படி பீகாரில் நடைபெற்ற முதற்கட்ட பணியில் சுமார் 47 லட்சம் போலி வாக்காளர்கள் பட்டியலிலிருந்து நீக்கப்பட்டனர்.
இரண்டாம் கட்டமாக
2025 ஆம் ஆண்டு தமிழகம், கேரளா உள்ளிட்ட 12 மாநிலங்களில் நடத்தப்பட்ட ஆய்வில், உத்தரப் பிரதேசத்தில் 2 கோடிக்கும் அதிகமான போலி வாக்காளர்களும், மேற்குவங்கத்தில் 83 லட்சம் போலி வாக்காளர்களும் கண்டறியப்பட்டு நீக்கப்பட்டனர்.
====
