Private Milk Price Hike in Tamil Nadu: Difference Between Aavin and Private Rates Reaches Up to Rs 30
தனியார் நிறுவனங்களின் பால் விலை உயர்வு
ஆவினுக்கான பால் கொள்முதல் விலை உயர்த்தப்பட்டதைத் தொடர்ந்து, தனியார் பால் நிறுவனங்களும் இன்றுமுதல் ( 26-09-2026) முதல் பால் மற்றும் தயிர் விலையை மீண்டும் உயர்த்தியுள்ளன.
இதனால் ஆவின் மற்றும் தனியார் பால் விற்பனை விலையில் லிட்டருக்கு ரூ.30 வரை வித்தியாசம் ஏற்படும் என தமிழ்நாடு பால் முகவர்கள் தொழிலாளர்கள் நலச் சங்கம் தெரிவித்துள்ளது அதிர்ச்சியை ஏற்படுத்தியுள்ளது.
கொள்முதல் விலை மற்றும் விற்பனை விலை மாற்றம்
ஆவினுக்கான பால் கொள்முதல் விலை லிட்டருக்கு ரூ.6 உயர்த்தப்பட்டதைத் தொடர்ந்து, தனியார் நிறுவனங்களும் கொள்முதல் விலையை உயர்த்தியுள்ளன. . இந்த கூடுதல் செலவை ஈடுகட்ட விற்பனை விலையை உயர்த்தி வருகின்றன.
விலை உயர்த்தியுள்ள நிறுவனங்களின் விவரம்
ஆரோக்கியா நிறுவனம் செப்.21-ல் பால் விலையை லிட்டருக்கு ரூ.4 வரையிலும், தயிர் விலையைக் கிலோவுக்கு ரூ.2 வரையிலும் உயர்த்தியது. அதைத் தொடர்ந்து டோட்லா, நெஸ்ட்லே, திருமலா, சீனிவாசா, வல்லபா, ஜெர்சி உள்ளிட்ட நிறுவனங்களும் இன்றுமுதல் விலையை உயர்த்தியுள்ளன.
புதிய பால் மற்றும் தயிர் விலை விவரங்கள்
500 மி.லி. சமன்படுத்தப்பட்ட பால்: ரூ.31-ல் இருந்து ரூ.32 ஆக உயர்வு.
நிலைப்படுத்தப்பட்ட பால்: ரூ.35-ல் இருந்து ரூ.37 ஆக உயர்வு.
முழுக்கொழுப்புச் சத்து பால்: ரூ.40-ல் இருந்து ரூ.42 ஆக உயர்வு.
1 லிட்டர் சமன்படுத்தப்பட்ட பால்: ரூ.59-ல் இருந்து ரூ.61 ஆக உயர்வு.
1 லிட்டர் நிலைப்படுத்தப்பட்ட பால்: ரூ.68-ல் இருந்து ரூ.70 ஆக உயர்வு.
1 லிட்டர் முழுக்கொழுப்புச் சத்து பால்: ரூ.78-ல் இருந்து ரூ.81 ஆக உயர்வு.
500 கிராம் சமன்படுத்தப்பட்ட தயிர்: ரூ.41-ல் இருந்து ரூ.42 ஆக உயர்வு.
இரட்டை சமன்படுத்தப்பட்ட தயிர்: ரூ.36-ல் இருந்து ரூ.37 ஆக உயர்வு.
ஆவின் பால் தட்டுப்பாடு அபாயம்
இந்த விலை உயர்வால் ஆவின் மற்றும் தனியார் பாலுக்கு இடையேயான விலை வித்தியாசம் லிட்டருக்கு ரூ.14 முதல் ரூ.30 வரை அதிகரிக்கும். இதனால் ஆவின் பால் மீதான நுகர்வோரின் கவனம் அதிகரித்து, ஆவின் பால் தட்டுப்பாடு ஏற்படும் வாய்ப்புள்ளதாக சங்கம் தெரிவித்துள்ளது.
சங்கத்தின் கோரிக்கை மற்றும் அரசு நடவடிக்கை
ஆவின் விற்பனை விலையை மாற்றியமைக்காததால், லிட்டருக்கு சராசரியாக ரூ.15-க்கும் மேல் இழப்பு ஏற்பட்டு, நாளொன்றுக்கு ரூ.4.70 கோடி இழப்பை ஆவின் சந்திப்பதாகச் சங்கத்தின் மாநிலத் தலைவர் சு.ஆ.பொன்னுசாமி தெரிவித்துள்ளார்.
தமிழக அரசு மறுபரிசீலனை செய்ய வலியுறுத்தல்
எனவே, தமிழக அரசு ஆவின் விற்பனை விலையில் உரிய மாற்றம் செய்ய வேண்டும் என்றும், பால்வளத் துறையை வலுப்படுத்தி தனியார் நிறுவனங்களின் அடிக்கடி விலை உயர்வை மறுபரிசீலனை செய்ய வேண்டும் என்றும் வலியுறுத்தியுள்ளார்.
=======
