Rs. 1,485 crore for the welfare of persons with disabilities: 'Nambikkai Illam' in 5 districts!
தமிழக சட்டப்பேரவையில் 2026-27 ஆம் நிதியாண்டிற்கான பொது பட்ஜெட்டைத் தாக்கல் செய்த நிதியமைச்சர் மரிய வில்சன், மாற்றுத்திறனாளிகள் நலத் துறைக்காக ரூ. 1,485 கோடி நிதி ஒதுக்கீடு செய்யப்பட்டுள்ளதாக அறிவித்தார்.
சமத்துவக் கொள்கையின் அடிப்படையில்
"மாற்றுத்திறனாளிகளை மகத்தான திறனாளிகளாக முதலமைச்சர் விஜய் மனதார எண்ணுகிறார்" எனக் குறிப்பிட்ட நிதியமைச்சர், 'பிறப்பொக்கும் எல்லா உயிர்க்கும்' என்ற சமத்துவக் கொள்கையின் அடிப்படையில் இத்துறைக்கான முக்கியத் திட்டங்களை வெளியிட்டார்.
நவீன உதவி உபகரணங்களுக்கு 50% நிதியுதவி
தற்போதுள்ள உதவி உபகரணங்கள் வழங்கும் திட்டத்தில் இடம்பெறாத நவீன மற்றும் உயர்தர தொழில்நுட்ப உபகரணங்களை வாங்குவதற்காக அரசு நிதியுதவி அளிக்கும்.
உபகரணங்கள் மற்றும் நிதியுதவி
செயற்கை நுண்ணறிவு சார்ந்த விளையாட்டுச் செயற்கை கால், மின்தசை சமிக்ஞை மூலம் செயல்படும் மேல்கை செயற்கை அவயம், உயர்தர உதவி உபகரணங்கள் மற்றும் கோக்ளியர் இம்ப்ளான்ட் பேட்டரி போன்றவை.
இந்த உபகரணங்களின் விலையில் 50 சதவீதம் அல்லது அதிகபட்சமாக ரூ. 30,000 வரை நிதியுதவி வழங்கப்படும்.
5 மாவட்டங்களில் 'நம்பிக்கை இல்லம்'
அறிவுசார் குறைபாடு உடையோருக்காக ‘நம்பிக்கை இல்லம்’ என்ற பெயரிலான அரசு நிறுவனங்கள் அமைக்கப்பட உள்ளன. அவை தஞ்சாவூர், திருவண்ணாமலை, சேலம், கடலூர் மற்றும் விருதுநகர் ஆகிய மாவட்டங்களில் அமைக்கப்பட உள்ளன.
3 வயது மற்றும் அதற்கு மேற்பட்ட குழந்தைகளுக்கு சிறப்புக் கல்வி, ஆரம்பகால பயிற்சி சேவைகள், மறுவாழ்வு மற்றும் தொழிற்பயிற்சி அளிக்கப்படும்.
செயல்பாட்டு முறை
முதற்கட்டமாக, ஒவ்வொரு நிறுவனமும் 50 மாணவர்கள் பயிலும் பகல்நேரப் பள்ளியாகச் செயல்படும். பின்னர், தங்குமிட வசதியுடன் கூடிய மையமாக இது மேம்படுத்தப்படும்.
நம்பிக்கை இல்லம்' திட்டத்திற்காக பட்ஜெட்டில் ரூ. 4 கோடி நிதி ஒதுக்கீடு செய்யப்பட்டுள்ளது.
=====
