கர்நாடகாவின் சதி வலையில் தமிழக அரசு சிக்கக் கூடாது : அன்புமணி ராமதாஸ் கண்டனம்!

Tamil Nadu government must not fall into Karnataka's trap: Anbumani Ramadoss condemns!

காவிரி நீர்ப்பகிர்வில் கர்நாடகாவின் 'நதிநீர் ஒத்துழைப்பு' என்ற அழைப்பை தமிழக அரசு நிராகரிக்க வேண்டும் என பாமக தலைவர் அன்புமணி ராமதாஸ் வலியுறுத்தல்.

கர்நாடகாவின் புதிய நிலைப்பாட்டிற்கு எதிர்ப்பு

காவிரி நதிநீர் பங்கீடு என்ற சட்டபூர்வ நிலையிலிருந்து விலகி, ‘நதிநீர் ஒத்துழைப்பு’ என்ற நிலையை நோக்கி நகர வேண்டிய தருணம் வந்துவிட்டதாக கர்நாடக முதலமைச்சர் டி.கே.சிவக்குமார் கூறியிருப்பது, தமிழகத்தின் உரிமைகளைப் பறிக்க விரிக்கப்படும் சதி வலையாகும்.

இதனைத தமிழக அரசு எந்தச் சூழலிலும் ஏற்றுக்கொள்ளக் கூடாது என்று பாமக தலைவர் டாக்டர் அன்புமணி ராமதாஸ் அறிக்கை வெளியிட்டுள்ளார்.

அந்த அறிக்கையில் அவர் கூறியிருப்பதாவது:

வரலாற்று மீறல்களும் துரோகங்களும்

காவிரி விவகாரத்தில் ஒத்துழைப்பு என்று பேசும் உரிமையைக் கர்நாடகம் 100 ஆண்டுகளுக்கு முன்பே இழந்துவிட்டது.

1892 & 1910 காவிரி நீர்ப்பகிர்வு உடன்பாடு

சென்னை - மைசூர் மாகாணங்களுக்கு இடையிலான 1892-ம் ஆண்டின் ஒப்பந்தத்தை மீறி 1910-ல் கண்ணம்பாடி அணை எனப்படும் கிருஷ்ணராஜ சாகர்) கட்ட முயற்சித்தது.

அணை கொள்ளளவு மீறல்

ஆங்கிலேய அரசு 11 டி.எம்.சி கொள்ளளவு மட்டுமே அமைக்க அறிவுறுத்திய நிலையில், அதை மீறி முதலில் 41.50 டி.எம்.சி, பின்னர் 49.45 டி.எம்.சி கொள்ளளவில் அணையைக் கட்டியது.

நீர்ப்பகிர்வு ஒப்பந்தம் புறக்கணிப்பு

1924-ம் ஆண்டின் நீர்ப்பகிர்வு ஒப்பந்தத்தை 1974-ல் புதுப்பிக்க மறுத்ததுடன், 1967–1977 இடைப்பட்ட காலத்தில் ஹேமாவதி, ஹாரங்கி, கபினி, சுவர்ணவதி ஆகிய 4 துணை ஆறுகளின் குறுக்கே அணைகளைக் கட்டியது.

தீர்ப்புகள் புறக்கணிப்பு

1990-ல் காவிரி நடுவர் மன்ற அமைப்பை எதிர்த்தது முதல் 1991 இடைக்காலத் தீர்ப்பு, 2007 இறுதித் தீர்ப்பு எனத் தொடர்ச்சியாகக் கடந்த 35 ஆண்டுகளாகத் தீர்ப்புகளைச் செயல்படுத்த மறுத்து வருகிறது.

உரிமைகள் பறிபோகும் அபாயம்

1990 முதல் 2018 வரையிலான 29 ஆண்டுகால சட்டப் போராட்டத்திற்குப் பிறகு தமிழகத்தின் உரிமைகள் நிலைநாட்டப்பட்டுள்ளன.

தண்ணீர் திறக்க மறுக்கும் போதெல்லாம்?

இப்போது நதிநீர் ஒத்துழைப்பு என்ற பேச்சு வார்த்தையை ஏற்றுக்கொண்டால், தண்ணீர் திறக்க மறுக்கும் போதெல்லாம் தமிழகத்தால் நீதிமன்றத்தை அணுக முடியாது.

கர்நாடகம் பிச்சையாக வழங்கும் நீரை மட்டுமே பெற முடியும் என்ற அவலை நிலைக்குத் தள்ளப்பட்டு, தமிழகத்தின் உரிமைகள் முற்றிலுமாகப் பறிபோகும்.

மேகதாது அணை சர்ச்சை

கோவளத்தில் நடைபெற்ற 31-வது தென்னிந்திய முதலமைச்சர்கள் மாநாட்டில், மேகதாது அணை கட்டுவதால் கர்நாடகாவிற்கு இணையாக தமிழகம் மற்றும் புதுச்சேரிக்கும் நன்மை கிடைக்கும் என்று சிவக்குமார் கூறியது தவறான தகவலாகும்.

தமிழக அரசுக்கு வலியுறுத்தல்

கர்நாடக அரசுடன் எவ்விதப் பேச்சுவார்த்தையும் நடத்தக் கூடாது. காவிரி நீர்ப்பகிர்வு மற்றும் மேகதாது அணை விவகாரங்களில் உச்சநீதிமன்றத்தில் நிலுவையில் உள்ள வழக்குகளை விரைவாகவும் திறமையாகவும் நடத்தித் தமிழகத்தின் உரிமைகளைப் பாதுகாக்க வேண்டும்.

=====