தேனி மாவட்ட சிறையிலிருந்து காவலர்களைத தாக்கிவிட்டு தப்பியோடிய 17 கைதிகளில், 4 பேரை காவல் துறையினர் பிடித்துள்ளனர்.
தப்பியோடிய மற்ற கைதிகளை பிடிக்க 17 தனிப்படைகள் அமைக்கப்பட்டு தீவிர தேடுதல் வேட்டை நடைபெற்று வருகிறது.
தேனி மாவட்டம், கண்டமனூர் அருகேயுள்ள தேக்கம்பட்டியில் மாவட்ட சிறை செயல்பட்டு வருகிறது.
பல்வேறு வழக்குகளில் கைது செய்யப்பட்ட 200-க்கும் மேற்பட்டோர் இந்தச் சிறையில் அடைக்கப்பட்டுள்ளனர்.
இந்நிலையில், திங்கள்கிழமை இரவு சிறையில் இருந்த கைதிகள் காவலர்களை தாக்கிவிட்டு தப்பியோடியுள்ளனர்.
மொத்தம் 17 கைதிகள் சிறையிலிருந்து தப்பியதாக தெரிவிக்கப்பட்டுள்ளது.
கைதிகள் நடத்திய தாக்குதலில் சிறையின் இரண்டாம் நிலைக் காவலர் தங்கப்பாண்டி பலத்த காயமடைந்தார்.
அவர் உடனடியாக தேனி அரசு மருத்துவ கல்லூரி மருத்துவமனையில் அனுமதிக்கப்பட்டார்.
மேலும், இரண்டு காவலர்களுக்கும் லேசான காயங்கள் ஏற்பட்டன.
இதையடுத்து, சிறை காவலர்கள் மாவட்ட காவல் கண்காணிப்பாளருக்குத் தகவல் தெரிவித்தனர்.
தகவலறிந்து சம்பவ இடத்துக்கு வந்த காவல் துறையினர், தப்பியோடிய கைதிகளை பிடிக்கும் நடவடிக்கையில் ஈடுபட்டனர்.
இதற்கிடையே, தப்பியோடிய 17 கைதிகளில் 4 பேரை காவல் துறையினர் அடுத்தடுத்து பிடித்துள்ளனர்.
மீதமுள்ள கைதிகளைப் பிடிக்க 17 தனிப்படைகள் அமைக்கப்பட்டுள்ளன.
சிறையிலிருந்து தப்பியோடிய கைதிகளைப் பிடிக்க காவல் துறையினர் தீவிரமாக தேடி வரும் நிலையில், இந்த சம்பவம் தேனி மாவட்டத்தில் பரபரப்பை ஏற்படுத்தியுள்ளது.
தேனி மாவட்ட சிறையிலிருந்து 17 கைதிகள் தப்பியோடிய சம்பவம் தொடர்பாக, சிறைத்துறை டிஜிபி சந்தீப் ராய் ரத்தோர் நடவடிக்கை எடுத்துள்ளார்.
சிறையின் பாதுகாப்புப் பணியில் அலட்சியமாக செயல்பட்டதாக கூறி, சம்பந்தப்பட்ட சிறைக் காவலர்களை அவர் இடைநீக்கம் செய்துள்ளார்.
இந்த சம்பவம் தொடர்பாக விசாரணையும் தொடர்ந்து நடைபெற்று வருகிறது.
====================
