விடுதலை சிறுத்தைகள், மதிமுக
திமுக கூட்டணியில் இருந்த விடுதலை சிறுத்தைகள் கட்சி, சட்டமன்ற தேர்தலுக்கு பிறகு, தவெக அரசுக்கு ஆதரவு அளித்து, கூட்டணி அரசிலும் இடம்பெற்று இருக்கிறது.
இருந்தாலும்,திமுகவுடன் நட்புடன் இருப்பதாக விசிக தலைவர் திருமாவளவன் கருத்து தெரிவித்தத சர்ச்சையானது. அவர் எந்தக் கூட்டணியில் இருக்கிறார் என்ற கேள்வியும் எழுப்பப்பட்டது.
அதேபோன்று, திமுக கூட்டணியில் அங்கம் வகித்த மதிமுகவும், தேர்தல் முடிந்த ஒரு மாதத்திற்கு பிறகு தவெகவை அரசுக்கு முழு ஆதரவை தெரிவித்துள்ளது.
இருப்பினும், உதயசூரியன் சின்னத்தில் போட்டியிட்ட அக்கட்சியின் இரண்டு உறுப்பினர்களும் பதவியை ராஜினாமா செய்யாதது, வைகோவிற்கு பின்னடைவு ஏற்படுத்தி உள்ளது.
பாஜக ஆட்சிக்கு திமுக முயற்சி
இந்தநிலையில், செய்தியாளர்களுக்கு பேட்டியளித்த வைகோ, தமிழகத்தில் ஆட்சியை கலைத்து விட்டு, ஆளுநர் ஆட்சி மூலம் பாஜக ஆட்சியை கொண்டு வர திமுக முயற்சிப்பதாக குற்றம்சாட்டினார்.
180 இடங்களில் தவெக வெற்றி
முதல்வர் விஜய் கரூருக்கு செல்லக் கூடாது என்று சென்றவர்களுக்கு உச்ச நீதிமன்றம் சாட்டையடி அடித்துள்ளது. இன்னொரு முறை தேர்தல் வந்தால் 180 இடங்களில் விஜய் வெற்றி பெறுவார்.
திருமாவுக்கு நோபல் பரிசு தரலாம்
தவெக ஆட்சியில் இடம் பெற்றிருந்தாலும், திமுக தலைவர் ஸ்டாலினுடனான கருத்து பரிமாற்றம் தொடர்வதாக, திருமாவளவன் கூறியதற்கு, நோபல் பரிசே கொடுக்கலாம்” என்று வைகோ கிண்டலாக கூறினார்.
நோபல் பரிசு பரிந்துரை - வைகோவுக்கு நன்றி
இதற்கு எதிர்வினை ஆற்றி இருக்கும் திருமாவளவன், “ தனக்கு நோபல் பரிசு கிடைக்க பரிந்துரை செய்ததற்காக வைகோவுக்கு நன்றி தெரிவிப்பதாக பதிலடி கொடுத்தார்.
யாரையும் எதிரியாக பார்க்க கூடாது
ஒரு கூட்டணியிலிருந்து ஒரு கட்சி வெளியேறிவிட்டால் அந்தக் கட்சியை எதிரிக்கட்சியாக பார்க்கக்கூடிய, தவறான அரசியல் கண்ணோட்டம் தமிழக அரசியலில் உள்ளது.
திமுக - தவெக இணைந்து செயல்பட வேண்டும்
விலகிய பின்னரும் நட்புறவு கூடாதா, பாஜகவை வீழ்த்த இண்டியா கூட்டணியில் தவெகவும், திமுகவும் இணைந்து செயல்பட வேண்டும்.
தவெக அமைச்சரவையில் நாங்கள் சேர்ந்தாலும், திமுகவுடனான உறவு முடியவில்லை, நட்பு தொடர்கிறது என்றேன்.அதேபோல, விருது வழங்கும் விழாவில் நாங்கள் அதிகாரப்பூர்வமாக அந்தக் கூட்டணியை முறித்துக் கொண்டதாகவும் சொல்லவில்லை.
இப்படி ஒரு நிலையில், எங்கள் கட்சி முன்னாள் எம்எல்ஏ ஒருவர் திமுகவில் சேர்ந்துள்ளார். இதன்மூலம் திமுக கூட்டணியில் விசிக இல்லை என உணர்த்தி விட்டார்கள். இந்த நிகழ்வை மனதில் வைத்துக் கொண்டு நாங்கள் ஒன்றும் திமுகவுடன் சண்டை போடவில்லை” என்று திருமாவளவன் பதிலளித்தார்.
===========================
