”மொழி அரசியல், மாத்திரை கவரில் இந்தி” : திமுகவுக்கு பதிலடி கொடுத்த தவெக...!

கரூர் அரசு மருத்துவ கல்லூரி :

கரூர் அரசு மருத்துவக் கல்லூரி மருத்துவமனையில் நோயாளிகளுக்கு வழங்கப்பட்ட மாத்திரை கவர்களில் இந்தி மொழி இடம்பெற்றிருந்தது தொடர்பாக எழுந்த சர்ச்சை, தற்போது அரசியல் விவாதமாக மாறியுள்ளது.

இந்த விவகாரத்தில் திமுக விமர்சனம் முன்வைத்த நிலையில், தமிழக வெற்றிக் கழகம் பதிலடி கொடுத்து அறிக்கை வெளியிட்டுள்ளது.

சமூக வலைதளங்களில் வைரலான புகைப்படங்கள் :

தமிழ்நாட்டில் தமிழ் மற்றும் ஆங்கிலம் ஆகிய இருமொழிக் கொள்கை மட்டுமே பின்பற்றப்பட்டு வருகிறது.

இந்நிலையில், கரூர் அரசு மருத்துவமனையில் வழங்கப்பட்ட சில மாத்திரை கவர்களில் தமிழ், ஆங்கிலத்துடன் இந்தி மொழியும் இடம்பெற்றிருந்த புகைப்படங்கள் சமூக வலைதளங்களில் பரவின.

இதையடுத்து, தமிழ்நாட்டில் இந்தி திணிப்பு நடக்கிறதா என்ற கேள்வியை எழுப்பி திமுக உள்ளிட்ட பலரும் கண்டனம் தெரிவித்தனர்.

“இது தற்போதைய அரசின் நடவடிக்கை அல்ல”

இந்த சர்ச்சைக்கு விளக்கம் அளித்த மருத்துவமனை நிர்வாகம், தற்போது விவாதமாகியுள்ள மாத்திரை கவர்கள் புதிதாக அச்சிடப்பட்டவை அல்ல என்று தெரிவித்துள்ளது.

கடந்த 2025 டிசம்பர் மாதம் கரூர் அரசு மருத்துவக் கல்லூரி மருத்துவமனை சார்பில் வழங்கப்பட்ட ஆணையின் அடிப்படையில், ஈரோடு கூட்டுறவு அச்சகத்தில் இந்த கவர்கள் அச்சிடப்பட்டதாகவும், அவை தற்போது பயன்பாட்டில் இருந்து திரும்பப் பெறப்பட்டுள்ளதாகவும் கூறப்பட்டுள்ளது.

திமுகவை விமர்சித்த தவெக :

இந்த விவகாரம் தொடர்பாக சமூக வலைதளத்தில் பதிவு வெளியிட்டுள்ள தமிழக வெற்றிக் கழகம், “கரூர் அரசு மருத்துவக் கல்லூரி மருத்துவமனையில் வழங்கப்பட்ட மாத்திரை கவரில் இந்தி இடம்பெற்றதாக தற்போது குற்றச்சாட்டு முன்வைக்கப்படுகிறது.

ஆனால் அந்த கவர்கள் அச்சிடப்பட்டது திமுக ஆட்சிக் காலத்தில்தான்” எனக் குறிப்பிட்டுள்ளது.

மேலும், தமிழ்நாட்டில் அண்ணா வகுத்த இருமொழிக் கொள்கையே தமிழக வெற்றிக் கழக அரசின் உறுதியான நிலைப்பாடு என்றும், மொழிக் கொள்கையில் எந்த சமரசமும் இல்லை என்றும் தெரிவித்துள்ளது.

அமைச்சர் அருண்ராஜின் விளக்கம் :

இந்த விவகாரம் குறித்து சுகாதாரத்துறை அமைச்சர் கே.ஜி. அருண்ராஜும் விளக்கம் அளித்துள்ளார்.

சர்ச்சைக்குரிய மாத்திரை கவர்கள் முந்தைய ஆட்சிக் காலத்தில் அச்சிடப்பட்டவை என்றும், தகவல் தெரியவந்தவுடன் அவற்றின் பயன்பாடு நிறுத்தப்பட்டதாகவும் அவர் கூறியுள்ளார்.

மீண்டும் எழுந்த மொழி அரசியல் :

தமிழ்நாட்டில் மொழிக் கொள்கை மற்றும் இந்தி திணிப்பு விவகாரம் தொடர்ந்து அரசியல் முக்கியத்துவம் வாய்ந்த பிரச்சினையாக இருந்து வருகிறது.

இந்த நிலையில், ஒரு மருத்துவமனை மாத்திரை கவரில் இந்தி இடம்பெற்ற விவகாரம், திமுக - தவெக இடையேயான புதிய அரசியல் மோதலாக மாறியுள்ளது.

மாத்திரை கவரில் இந்தி இடம்பெற்றது எப்படி? யார் பொறுப்பு? என்ற கேள்விகளை தாண்டி, தமிழ்நாட்டின் இருமொழிக் கொள்கை குறித்த விவாதத்தை இந்த சம்பவம் மீண்டும் முன்வைத்துள்ளது.

=================