ஐரோப் நாடுகளுக்கு அதிகரிக்கும் தேவை :
ஐரோப்பிய நாடுகளில் டீசலுக்கான தேவை தொடர்ந்து அதிகரித்து வரும் நிலையில், அந்த தேவையை பூர்த்தி செய்வதில் இந்தியா முக்கிய பங்காற்றி வருகிறது.
சமீபத்தில் வெளியான சர்வதேச எரிசக்தி சந்தை தரவுகளின்படி, ஆகஸ்ட் மாதத்தில் ஐரோப்பாவிற்கு சென்ற டீசல் சரக்குகளில் சுமார் 60 சதவீதம் இந்தியாவில் சுத்திகரிக்கப்பட்ட எரிபொருளாக இருந்தது.
இதன் மூலம் உலக எரிசக்தி வர்த்தகத்தில் இந்தியாவின் முக்கியத்துவம் மேலும் உயர்ந்துள்ளது.
உக்ரைன் போருக்குப் பிறகு ரஷ்யாவின் எண்ணெய் மற்றும் டீசல் ஏற்றுமதி பல்வேறு சவால்களை சந்தித்து வருகிறது.
சுத்திகரிப்பு நிலையங்கள் மீதான தாக்குதல்கள் மற்றும் தளவாட சிக்கல்கள் காரணமாக ரஷ்யாவின் டீசல் உற்பத்தி மற்றும் ஏற்றுமதி குறைந்துள்ளது.
அதே நேரத்தில் அமெரிக்காவிலிருந்தும் ஐரோப்பாவுக்கு செல்லும் டீசல் ஏற்றுமதி கணிசமாக குறைந்துள்ளது.
இதனால் ஏற்பட்ட வெற்றிடத்தை இந்தியா திறம்பட நிரப்பி வருகிறது.
குஜராத் மாநிலத்தில் செயல்படும் உலகின் மிகப்பெரிய சுத்திகரிப்பு வளாகங்களில் ஒன்றான ரிலையன்ஸ் மற்றும் நயாரா எனர்ஜி உள்ளிட்ட நிறுவனங்கள் அதிகளவில் டீசல் உற்பத்தி செய்து ஐரோப்பிய சந்தைகளுக்கு ஏற்றுமதி செய்து வருகின்றன.
இந்தியாவின் மேம்பட்ட சுத்திகரிப்பு திறன் மற்றும் சர்வதேச சந்தை தேவைக்கு ஏற்ப உற்பத்தியை மாற்றும் திறன் இந்த வளர்ச்சிக்கு முக்கிய காரணமாக உள்ளது.
ஒரு காலத்தில் கச்சா எண்ணெய் இறக்குமதியை பெரிதும் நம்பியிருந்த இந்தியா, தற்போது சுத்திகரிக்கப்பட்ட எரிபொருட்களை உலக நாடுகளுக்கு ஏற்றுமதி செய்யும் முக்கிய மையமாக மாறியுள்ளது.
ஐரோப்பாவின் டீசல் தேவையில் பெரும்பகுதியை இந்தியா பூர்த்தி செய்வது, உலக எரிசக்தி விநியோகச் சங்கிலியில் இந்தியாவின் செல்வாக்கு அதிகரித்திருப்பதை காட்டுகிறது.
டீசல் ஏற்றுமதி அதிகரிப்பதன் மூலம் இந்தியாவுக்கு அந்நியச் செலாவணி வருவாய் அதிகரிக்கிறது.
மேலும், இந்திய சுத்திகரிப்பு நிறுவனங்களின் வருவாய் மற்றும் லாபமும் உயர வாய்ப்புள்ளது.
உலக சந்தையில் இந்தியாவின் எரிசக்தி ஏற்றுமதி திறன் மேலும் வலுப்பெற இது ஒரு முக்கிய முன்னேற்றமாக பார்க்கப்படுகிறது.
ஐரோப்பாவின் டீசல் தேவையில் 60 சதவீதத்தை இந்தியா பூர்த்தி செய்திருப்பது, இந்தியா ஒரு பெரிய நுகர்வோர் நாடாக மட்டுமல்லாமல் உலக எரிசக்தி சந்தையை தீர்மானிக்கும் முக்கிய சக்தியாகவும் உருவெடுத்து வருவதை வெளிப்படுத்துகிறது.
===============
