சீன அதிபர் ஷி ஜின்பிங், 3 நாள் அரசுமுறை பயணமாக அமெரிக்கா சென்றுள்ளார்.
11 ஆண்டுகளுக்குப் பிறகு சீன அதிபர் ஒருவர் அமெரிக்காவுக்கு சென்றிருப்பதால் இந்த பயணம் உலக அரசியல் வட்டாரங்களில் பெரும் கவனத்தை ஈர்த்துள்ளது.
அமெரிக்கா - சீனா இடையேயான வர்த்தகம், தொழில்நுட்பம் மற்றும் பாதுகாப்பு தொடர்பான முக்கிய விவாதங்களுக்கு மத்தியில் இந்த சந்திப்பு நடைபெறுகிறது.
ஷி ஜின்பிங்கின் வருகையை முன்னிட்டு அமெரிக்கா சிறப்பு ஏற்பாடுகளை செய்திருந்தது.
வழக்கமாக வெளிநாட்டு தலைவர்களை விமான நிலையத்திற்கு சென்று அமெரிக்க அதிபர்கள் வரவேற்பது அரிதான நிலையில், டொனால்ட் டிரம்ப் நேரடியாக விமான நிலையத்திற்கு சென்று ஷி ஜின்பிங்கை வரவேற்றார்.
பல தசாப்தங்களுக்குப் பிறகு இந்த நடைமுறை பின்பற்றப்பட்டதாக தகவல்கள் தெரிவிக்கின்றன.
விமான நிலைய வரவேற்பைத் தொடர்ந்து, வெள்ளை மாளிகையில் ஷி ஜின்பிங்கிற்காக அரசுமுறை விருந்து நடைபெற்றது.
டிரம்ப் மற்றும் அவரது மனைவி மெலானியா டிரம்ப், வெள்ளை மாளிகை நுழைவாயிலில் காத்திருந்து ஷி ஜின்பிங் மற்றும் அவரது மனைவி பெங் லியுவானை வரவேற்றனர்.
நிகழ்ச்சியில் இரு நாட்டு தலைவர்களும் ஒருவரையொருவர் பாராட்டி பேசினர்.
விருந்தின் போது அமெரிக்கா - சீனா உறவுகள் மட்டுமல்லாமல், கல்வி மற்றும் கலாச்சார ஒத்துழைப்பையும் வலுப்படுத்தும் வகையில் முக்கிய அறிவிப்புகளை ஷி ஜின்பிங் வெளியிட்டார்.
குறிப்பாக, அடுத்த ஐந்து ஆண்டுகளில் ஒரு லட்சம் அமெரிக்க மாணவர்களை சீனாவிற்கு அழைத்து வந்து கல்வி கற்கச் செய்யும் திட்டத்தை அவர் மீண்டும் வலியுறுத்தியதாக தகவல்கள் தெரிவிக்கின்றன.
வெள்ளை மாளிகையில் நடைபெற்ற இந்த பிரமாண்ட விருந்தில் உலகின் மிகப்பெரிய தொழில்நுட்ப நிறுவனங்களின் தலைமை அதிகாரிகள் பலர் பங்கேற்றனர்.
இதில் இந்திய வம்சாவளியைச் சேர்ந்த தொழிலதிபர்களின் பங்கேற்பு தனி கவனம் பெற்றது.
குறிப்பாக, கூகுள் மற்றும் ஆல்பாபெட் நிறுவனத்தின் தலைமைச் செயல் அதிகாரி சுந்தர் பிச்சை, மைக்ரோசாப்ட் தலைவர் சத்யா நாதெல்லா, மைக்ரான் டெக்னாலஜி நிறுவனத்தின் தலைவர் சஞ்சய் மெஹ்ரோத்ரா ஆகியோர் விருந்தில் கலந்து கொண்டனர்.
அதேபோல், என்விடியா நிறுவனத்தின் தலைமைச் செயல் அதிகாரி ஜென்சன் ஹுவாங், ஆப்பிள் நிறுவனத்தின் தலைமைச் செயல் அதிகாரி டிம் குக், டெஸ்லா நிறுவனர் எலான் மஸ்க், மெட்டா நிறுவனர் மார்க் ஜுக்கர்பர்க் உள்ளிட்ட உலகின் முன்னணி தொழில்நுட்ப ஜாம்பவான்களும் இந்த நிகழ்வில் பங்கேற்றனர்.
======================
